Stjórnarmyndunarviðræður á Spáni hafa siglt í strand og hefur verið boðað til nýrra þingkosninga. Kosningarnar verða þær fjórðu á jafnmörgum árum. El Pais greinir frá.
Sósíalistaflokkur Pedro Sanchez, starfandi forsætisráðherra, bar sigur úr býtum í kosningum í apríl en náði þó ekki meirihluta atkvæða. Við tóku viðræður við aðra flokka sem báru ekki erindi sem erfiði.
„Ég hef reynt allt, en þetta er ómögulegt, sagði Sanchez og skellti skuldinni á andstæðinga sína á þingi, sérstaklega Podemos flokk Pablo Iglesias. Sagði Sanchez að Iglesias væri eini vinstri sinnaði leiðtoginn í Evrópu sem hafi í fjórgang komið í veg fyrir framsækna ríkisstjórn.
Stjórnarsamstarf Sósíalista og Podemos var nálægt því að verða að veruleika í júlí en ósætti með ráðherrastöður urðu til þess að ekki varð af samstarfinu.
Þing verður nú brátt rofið og formlega verður boðað til nýrra kosninga á mánudag. Kosningarnar munu fara fram 10. Nóvember næstkomandi.
Boðað til nýrra kosninga á Spáni
Tengdar fréttir
Erfið vika framundan fyrir Sánchez sem reynir enn að mynda ríkisstjórn
Sánchez fær tvö tækifæri í vikunni til þess að tryggja sér meirihlutann í neðri deild spænska þingsins en hann hefur enn sem komið er enga tryggingu fyrir því að umboðið fáist.
Sánchez hafnað í spænska þinginu
Möguleikinn á fjórðu þingkosningunum á jafnmörgum árum á Spáni fer vaxandi.
