Ók næstum á lögreglumann á flótta undan lögreglu

Karlmaður, sem er meðal annars grunaður um innbrot, nytjastuld og umferðarlagabrot var á föstudag úrskurðaður í fjögurra vikna gæsluvarðhald í Héraðsdómi Reykjavíkur. Karlmaðurinn er talinn hafa rofið í verulegum atriðum skilyrði skilorðsbundins dóms samkvæmt tilkynningu frá lögreglu.

Maðurinn var handtekinn í íbúð í austurborginni fyrir helgina en áður hafði hann virt að vettugi stöðvunarmerki lögreglu annars staðar í borginni og komist undan á bifreið. Við það tækifæri var maðurinn næstum því búinn að aka á lögreglumann sem ætlaði að stöðva för hans.