Ólga á Reykjalundi: Sveinn fékk skýr skilaboð frá starfsmanni

Sjúklingar Reykjalundar hafa fengið þau skilaboð frá starfsfólki að starfsemin verði með eðlilegum hætti á morgun. Var sjúklingum vísað frá í morgun af starfsfólki sem taldi sig ekki í stakk búið að sinna þeim sökum þess að framkvæmdastjóra lækningasviðs hafði verið sagt upp störfum í gær.

Birgir Gunnarsson hafði starfað sem forstjóri Reykjalundar í tólf ár þegar honum var sagt upp 30. september síðastliðinn. Í gær var nánum samstarfsmanni hans, Magnúsi Ólasyni, sagt upp sem framkvæmdastjóra lækningasviðs Reykjalundar.

Starfsfólk Reykjalundar var boðað til starfsmannafundar með stjórnarformanni SÍBS, sem á heilbrigðisstofnunina Reykjalund, í dag. Fór fundurinn fram í samkomusal þar sem sjúklingum var tilkynnt að ekkert yrði af reglubundinni slökun í salnum vegna fundarins.

Á fundinum steig meðal annars Birgir Gunnarsson í pontu og hélt erindi. Hlaut hann kröftugt lófaklapp frá starfsmönnum Reykjalundar þegar hann hafði lokið máli sínu.

Sveinn Guðmundsson, stjórnarformaður SÍBS, fór yfir stöðu mála með starfsfólkinu. Þar greindi hann frá því að ráðningarferli nýs forstjóra og framkvæmdastjóra stæði yfir. Sagðist hann búast við að tilkynna um nýjan framkvæmdastjóra lækningasviðs í byrjun næstu viku. Þá afhenti hann starfsmönnum bréf frá landlækni þar sem ítrekuð var skylda starfsmanna um að sinna sjúklingum stofnunarinnar.

Skilin eftir í tóminu

Fjölmiðlamönnum var ekki veittur aðgangur að starfsmannafundinum sem fór fram fyrir lokuðum dyrum. Þegar starfsfólk gekk út af fundinum var augljóst að þeim var mikið niðri fyrir.

Höfðu starfsmennirnir farið með vantraustsyfirlýsingu á stjórn SÍBS til heilbrigðisráðherra fyrir fundinn.

Magdalena Ásgeirsdóttir, yfirlæknir á Reykjalundi, sagði ástæðuna vera framferði stjórnar gagnvart starfsmönnum

„Fyrirvaralausar uppsagnir á forstjóra, 30. september, og framkvæmdastjóra lækninga í gær, án nokkurra skýringa. Við erum skilin eftir í tóminu. Sveinn Guðmundsson, stjórnarformaður SÍBS, gaf út yfirlýsingu þar sem hann sagði ekkert saknæmt hafa átt sér stað. Þannig að það er einhver ágreiningur sem við fáum ekki að vita hver er,“ sagði Magdalena.

Næstum bornir út úr húsi

Í vantraustsyfirlýsingunni er talað um hranalega og ómanneskjulega framkomu af hálfu stjórnar sem skapar óvissu, óöryggi og vanlíðan.

„Með þessum uppsögnum þar sem þessir menn, forstjóri og framkvæmdastjóri lækninga, eru næstum því bornir út úr húsi. Það var slökkt á tölvuaðgangi þeirra. Sem var sérstaklega alvarlegt í tilfelli framkvæmdastjóra lækninga sem er með sjúklingavinnu. Sjúklingagögn eru læst í hálfri vinnslu. Hann er með skjólstæðinga sem hann ber ábyrgð á og hefur ekki nokkurn möguleika á að klára sína vinnu þar.“

Fólk er í angist

Magdalena sagði andrúmsloftið hafa verið slæmt þegar forstjórinn var rekinn en óbærilegt eftir að framkvæmdastjóranum var sagt upp störfum í gær.

„Fólk er í angist, við erum höfuðlaus her. Það er enginn sem stýrir okkur. Við vitum ekki réttarstöðu okkar, gagnvart okkar skjólstæðingum eða réttarstöðu skjólstæðinga gagnvart okkur þar sem að faglegur ábyrgðarmaður og framkvæmdastjóri lækninga er ekki lengur til. Það er ekki búið að ráða neinn, það er ekki eins og hann hafi skroppið í frí og skipað einhvern annan. Það er enginn sem upplýsir okkur um það annað en það sem Sveinn Guðmundsson gerði á fundinum á áðan með upplestri á bréfi frá landlækni sem fyrir fundinn var ekki komið í tölvupósti til okkar starfsmanna þar sem hann hnykkir á okkar ábyrgð sem fagfólk að sinna okkar sjúklingum.“

Sjúklingarnir voru sendir heim því starfsfólkið var ekki í andlegu ástandi til að sinna þeim að sögn Magdalenu.

„Við erum á vaktinni og sinnum bráðatilfellum en hefðbundin endurhæfing hefur ekki farið fram í dag,“ segir Magdalena.

Vilja ekki vinna undir ógnarstjórn

Spurð hver framtíð Reykjalundar sé með þessu áframhaldi svarar Magdalena:

„Hún er ónýt, hún hverfur. Það er þegar komið los á starfsfólk. Fólk vill ekki vinna undir svona ógnarstjórn sem ber fólk út eftir áratuga starf, flekklausan feril. Andlit íslenskrar endurhæfingar er borið út hér á nokkrum mínútum í gær.“

Sveinn Guðmundsson sagði eftir fundinn að nauðsynlegt hefði verið að segja forstjóranum og framkvæmdastjóra lækninga upp. Hann neitaði þó að tjá sig frekar um uppsagnirnar sem hann sagði bundnar trúnaði. Tók Sveinn fram að Birgir hefði verið mjög flottur stjórnandi og að ekki væru fleiri uppsagnir í kortunum.

Enginn ágreiningur um peninga

Reykjalundur hefur haft leigutekjur af húsnæðinu undanfarin ár sem nema um 30 milljónum króna á ári. Greint hefur verið frá því að málið snúist um baráttu á milli SÍBS og Reykjalundar um hvernig skuli nýta þá peninga en Reykjalundur er heilbrigðisstofnun í eigu SÍBS.

Sveinn vill þó sem minnst úr þessum deilum gera. Um „eldgamalt“ mál sé að ræða sem tekið hafi verið úr öllu samhengi. Það sé þannig ekki rétt að SÍBS ætli sér að taka þessar tekjur til sín, eins og látið hafi verið í veðri vaka. „Hið rétta er að það var verið að benda á að það hvernig ætti að færa bókhaldið með þessar tekjur. Ég skil ekki hvernig þetta mál er komið upp í fjölmiðlum því það er enginn ágreiningur um peninga hvað þetta varðar,“ segir Sveinn.

Annað hvort Sveinn eða starfsmennirnir

Þegar vantraustsyfirlýsingin var borin undir Svein neitaði hann að tjá sig um það hvort hann hefði íhugað stöðu sína sem stjórnarformaður. Við það brást einn starfsmanna ókvæða við og sagði við Svein að staðan væri einföld, annað hvort hyrfi hann frá eða starfsmennirnir.

Um var að ræða Halldór Halldórsson, fyrsta íslenska hjarta- og lungnaþegann, sem starfar sem ritari á hjarta- og lungnarannsóknardeild Reykjalundar. Hann sagði mikla reiði í starfsfólki.

„Heldur betur. Ég er búinn að vera í þessu húsi síðan 1988 og hef aldrei upplifað aðra eins steypu. Ef þessi stjórn SÍBS fer ekki frá þá fer starfsfólkið. Hvað á þá að gera við sjúklingana?,“ spurði Halldór þegar hann ræddi við fréttamenn.

Staðnum rústað á nokkrum dögum

Hann sagði andlega líðan starfsfólks hafa verið skelfilega upp á síðkastið. „Og það er mjög erfitt að einbeita sér að meðferð sjúklings þegar maður ekki með fókus á hvað á að gera. Auðvitað er það mjög slæmt en það síðasta sem við viljum er að það bitni á sjúklingum.“

Halldór sagði frið hafa ríkt um starfsemi Reykjalundar og góður andi sé í húsinu.

„En svo kemur svona fólk eins og Sveinn Guðmundsson og þeir sem eru á bak við hann í SÍBS og rústar þessum stað á nokkrum dögum. Nú er mál að linni.“

Hann vill að aðildarfélög SÍBS kalli saman þing þar sem kjörin verður ný stjórn. „Og jafnvel að starfsemi Reykjalundar verði endurskoðuð. Hvort ríkið ætti að taka þetta yfir eða breyta starfseminni þannig að við getum hjálpað Landspítalanum við fráflæði þannig að við getum nýtt staðinn enn betur sem er nú þegar vel nýttur.“