Undir það búinn að fara á eftirlaun en ekki fyrirvaralausa uppsögn

Magnús Ólason, fyrrverandi framkvæmdastjóri lækninga á Reykjalundi sem sagt var upp fyrirvaralaust í síðasta mánuði, segist hafa verið undirbúinn undir starfslok sín, enda sjötugur. Hann hafi þó ekki verið tilbúinn til að vera rekinn án nokkurrar ástæðu eða skýringa. Þetta segir Magnús í samtali við Læknablaðið.

Sveinn Guðmundsson, formaður Sambands íslenskra berkla- og brjóstholssjúklinga (SÍBS), sagði Magnúsi upp störfum í byrjun október eftir 35 ára starf á endurhæfingarstöðinni. Áður hafði Birgi Gunnarssyni forstjóra Reykjalundar einnig verið sagt upp.

Nýtt skipurit Reykjalundar sem kynnt var í sumarbyrjun, og áðurnefndar uppsagnir Birgis og Magnúsar, voru upphaf mikillar ólgu á Reykjalundi. Eftir að nýir stjórnendur tóku við hefur meirihluti lækna á Reykjalundi sagt upp störfum. Þá hafa aðrir starfsmenn lýst yfir gríðarlegum áhyggjum af stöðunni og sagt nauðsynlegt að endurskoða aðkomu stjórnar SÍBS að starfsemi Reykjalundar.

Íhugar stöðu sína með aðstoð Læknafélagsins

Magnús hefur lítið tjáð sig um uppsögnina hingað til. Hann ræddi hana til að mynda stuttlega í samtali við RÚV á sínum tíma en fer ítarlega yfir hana í nýjasta tölublaði Læknablaðsins sem kom út nú í byrjun mánaðar.

Í viðtalinu segir Magnús að vandamálið hafi ekki verið að hætta að vinna, hann hafi verið undir það búinn. Magnús er sjötugur og eftirlaun því á næsta leyti, eðli málsins samkvæmt. Hann hafi hins vegar ekki verið undirbúinn undir að vera „látinn fara fyrirvaralaust án nokkurrar ástæðu“ og engar skýringar gefnar.

Magnús greinir jafnframt frá því að hann hafi þegar fengið nokkur starfstilboð eftir hin óvæntu starfslok á Reykjalundi. Hann kveðst þó vera að skoða stöðu sína gagnvart SÍBS með aðstoð frá Læknafélagi Íslands.

Magnús lýsir því einnig í viðtalinu við Læknablaðið að hann hafi fengið umboð til að klára þjónustusamning við Sjúkratryggingar Íslands viku áður en hann var rekinn. Þá hafi hann boðist til að vinna uppsagnarfrest en því var hafnað.

„Ég var auðvitað tilbúinn að hætta en ég ætlaði ekki að hætta svona. […] Mér finnst þessi gjörningur í raun svo makalaus og svo vitlaus. Ég er aðallega sár út í að með ákveðnum hætti sé verið að eyðileggja þennan stað sem ég hef lagt krafta mína í frá því að ég kom heim úr sérnámi.“

Viðtalið við Magnús í Læknablaðinu má lesa í heild hér.

Ekki á þeim buxunum að hætta

Sveinn Guðmundsson formaður SÍBS var sérstaklega spurður út í uppsögn Magnúsar í þættinum Reykjavík síðdegis í október. Sveinn sagðist hafa staðið í þeirri trú að búið væri að segja Magnúsi upp störfum sökum aldurs, enda búið að ráða í starf hans.

Ólafur Þór Ævarsson geðlæknir var ráðinn í starf Magnúsar og þá tók Herdís Gunnarsdóttir, framkvæmdastjóri endurhæfingarsviðs á Reykjalundi, tímabundið við starfi forstjóra. Síðarnefnda staðan var auglýst til umsóknar í Morgunblaðinu í gær.

„Við erum bundin því að borga manninum uppsagnarfrest. Það þýðir ekkert að bíða með það,“ sagði Sveinn í viðtalinu í október. Magnús hafi ekki verið á þeim buxunum að hætta og því ekkert annað í stöðunni en að segja honum upp.

Samkvæmt heimildum fréttastofu á óháð starfsstjórn yfir Reykjalundi nú að mæta kröfum starfsfólks um aðskilnað við SÍBS og ráða nýjan forstjóra. Búist er við að starfsstjórnin verði kynnt á næstu dögum. Þá ætlar SÍBS eftir sem áður að styrkja Reykjalund en ekki skipta sér af neinni stjórnun.