„Hver myndi mæta fyrir utan mömmu og pabba?“

Phil Jones hefur ekki átt sjö dagana sæla hjá Manchester United en hann átti meðal annars sök á einu marki Sheffield United er liðin gerðu 3-3 jafntefli á sunnudaginn.

Jones skrifaði undir fjögurra ára samning við United í febrúar en ein klásúla samningsins var sú að hann fengi heiðursleik hjá félaginu vegna tíu ára starfsafmælis.

Enski varnarmaðurinn hafði víst lítinn áhuga á því og á að hafa sagt samkvæmt The Athletic: „Hver myndi mæta fyrir utan mömmu og pabba?“

Phil Jones 'rejected Man United testimonial' when he signed new deal as he feared, 'Apart from my mum and dad, who would turn up?' https://t.co/xpIJirKYPc

— MailOnline Sport (@MailSport) November 28, 2019

Jones gekk í raðir United sem táningur en hann skrifaði undir samning hjá félaginu árið 2011 er hann kom frá Blackburn en United hafði þá betur í baráttunni við Liverpool, Arsenal og Chelsea.

Sir Alex Ferguson hafði mikla trú á Jones og það hafði Sir Bobby Charlton einnig en Jones hefur einungis leikið 220 leiki fyrir félagið á þeim átta árum sem hann hefur verið þar.

Hann hefur varla komist í leikmannahópinn hjá Ole Gunnar Solskjær en byrjaði svo í leiknum gegn Sheffield United. Eftir mistökin í fyrri hálfleik var hann tekinn út af.