Hæstiréttur staðfestir endanlega fimmtíu milljóna króna sekt Eimskips

Fimmtíu milljóna króna stjórnvaldssekt sem Fjármálaeftirlitið gerði Eimskip að greiða stendur. Þetta er niðurstaða Hæstaréttar sem kvað upp dóm sinn í morgun. Er niðurstaðan í takt við fyrri dóma í málinu fyrir héraði og Landsrétti. Eimskip þarf einnig að greiða ríkinu 1,2 milljónir króna í málskostnað.

Hæstiréttur féllst á að taka málið fyrir þar sem það kynni að hafa fordæmisgildi hvað varðaði skýringu á innherjaupplýsingum og hvenær upplýsingaskylda samkvæmt lögum um verðbréfaviðskipti myndast.

Í málinu var deilt um ákvörðun FME að sekta Eimskip um fimmtíu milljónir fyrir brot á lögum um verðbréfaviðskipti með því að hafa látið hjá líða að birta innherjaupplýsingar á tilsettum tíma.

Drög lágu fyrir viku fyrr

Það var fimmtudaginn 26. maí 2016 sem Eimskip birti ársfjórðungsuppgjör fyrir fyrsta ársfjórðung þess árs. EBITDA og afkomuspá höfðu hækkað vel á milli ára og var uppgjörið samþykkt á fundi stjórnar sama dag. Daginn eftir var haldin fjárfestakynning þar sem farið var yfir málin. Sama dag hækkað gengi bréfa í félaginu verulega og áfram hækkuðu þau eftir helgina. 

FME gerði athugasemd við það að drög að árshlutauppgjörinu hefðu legið fyrir þann 20. maí 2016. Eimskip hefði samkvæmt lögum átt að birta upplýsingarnar eins fljótt og auðið væri. Var vísað til jafnræðisgrundvallar. Ella hefði Eimskip átt að festa birtingu upplýsinganna. Þar sem hvorugt hefði verið gert hefði skipafélagið brotið lög um verðbréfaviðskipti.

Eimskipafélagið krafðist þess að sektin yrði ógild vegna þess að Fjármálaeftirlitið hefði í ákvörðun sinni ranglega lagt til grundvallar að birtingarskyldar innherjaupplýsingar hefðu orðið til í síðasta lagi 20. maí 2016 þegar fyrstu drög að árshlutauppgjöri lágu fyrir. Lokaútgáfa uppgjörsins hefði svo verið samþykkt 26. maí. 

Hvorki Héraðsdómur Reykjavíkur né Landsréttur féllust á málflutning Eimskipafélagsins vegna þess að í drögum að ársreikningi hafi komið fram nægilegar upplýsingar sem hefðu getað haft áhrif á mat fjárfesta á félaginu.

Lögum samkvæmt skal refsing við brotum sem þessum nema að lágmarki 800 þúsund krónum en að hámarki 800 milljón krónum.

Dómur Hæstaréttar

Í dómi Hæstaréttar var, líkt og í héraðsdómi, vísað til þess að í dómaframkvæmd Evrópudómstólsins hefði því verið slegið föstu að einstaka atburður eða aðstæður í þrepaskiptu ferli gæti eitt og sér falið í sér nægjanlega tilgreindar upplýsingar við skilgreiningu innherjaupplýsinga samkvæmt fyrrnefndu lagaákvæði.

Drög að árshlutareikningi gætu ótvírætt talist atburður í slíku þrepaskiptu ferli sem miði að samþykkt og birtingu hans. Var jafnframt tekið fram að upplýsingar í afkomuspá Eimskips hefðu ekki haft sömu þýðingu við mat á tilvist innherjaupplýsinga og rauntölur úr rekstri. Umræddar upplýsingar hafi því 20. maí 2016 verið nægilega tilgreindar og líklegar einar og sér til að hafa marktæk áhrif á markaðsverð hlutabréfa í Eimskip.

Var einnig vísað til þess að samkvæmt 1. mgr. 122. gr. laganna skuli birta innherjaupplýsingar eins fljótt og auðið er. Tekið var fram að sú þrenging á gildissviði þeirrar reglu, sem ráða mætti af 3. mgr. 5. gr. reglugerðar nr. 630/2005 um innherjaupplýsingar og markaðssvik, ætti sér ekki lagastoð í fyrrnefndu lagaákvæði.

Tilkynningarskyldan yrði því sem meginregla virk um leið og innherjaupplýsingar myndast.

Fréttin hefur verið uppfærð með dómi Hæstaréttar.