Ronaldo varaði Lukaku við því hversu erfitt væri að skora á Ítalíu

Romelu Lukaku segir Cristiano Ronaldo hafa varað hann við því hversu erfitt væri að skora í Seria A deildinni.

Lukaku gekk til liðs við Inter Milan frá Manchester United síðasta sumar. Hann hefur byrjað mjög vel á Ítalíu, skorað 14 mörk í 22 leikjum í öllum keppnum.

Belginn var í viðtali við New York Times þar sem hann sagði Ronaldo, annan fyrrum United-mann, hafa varað sig við hversu sterk varnarlega deildin væri.

„Hann sagði að hann hefði skorað út um allt, en þetta væri erfiðasti staðurinn,“ sagði Lukaku.

„Ef Cristiano Ronaldo finnst erfitt að skora þá hlýtur það að vera mjög erfitt.“

Hvort viðvörun Ronaldo hafi hjálpað Lukaku eitthvað er erfitt að segja, en Belginn er með betri tölfræði en Ronaldo. Portúgalinn hefur aðeins skorað 12 mörk í 21 leik.