Emil búinn að finna sér nýtt félag?

Íslenski knattspyrnumaðurinn Emil Hallfreðsson er búinn að finna sér nýtt félag ef marka má heimildir vefmiðilsins 433.

Í frétt 433 segir að Emil sé búinn að skrifa undir samning við ítalska C-deildarliðið Padova og að tilkynnt verði um félagaskiptin á næstu dögum.

Emil hefur æft með uppeldisfélagi sínu, FH, í vetur og leikið nokkra æfingaleiki með Hafnfirðingum en hann hefur verið án félags síðan hann yfirgaf ítalska úrvalsdeildarliðið Udinese síðasta vor.

Padova er í 4.sæti í Serie C en liðið féll úr B-deildinni á síðustu leiktíð.

Emil hefur leikið í ítalska boltanum frá árinu 2007 ef undan er skilið eitt tímabil þegar hann lék sem lánsmaður hjá Barnsley í Englandi.