Draumurinn um að fá enska landsliðið á Laugardalsvöllinn mögulega að deyja

Á næsta fjarfundi Knattspyrnusambands Evrópu með knattspyrnusamböndum álfunnar er ætlunin að ræða framtíð og útfærslu Þjóðadeildarinnar.

Það er orðið mjög þröngt um leiki Þjóðadeildarinnar í haust eftir að öllum leikjum í undankeppni EM í mars var ýtt áfram vegna útbreiðslu kórónuveirunnar. Við það bætist að deildir og Evrópukeppnir félagsliða þurfa líka fleiri leikdaga.

Í fyrstu heyrðust hugmyndir um að landsliðin þyrftu mögulega að spila þrjá leiki í hverri landsleikjatörn í stað tveggja en það myndir auka álagið gríðarlega á leikmenn.

Álagið verður mikið en knattspyrnuyfirvöld þurfa hreinlega að velja og hafna í þessu erfiða ástandi.

Hingað til hefur UEFA ekki verið að ræða Þjóðadeildina á sínum fundum enda þurfti sambandið að byrja á því að vinna úr meira áríðandi málum eins og útfærslu á Evrópumóti landsliða, landsdeildunum og Evrópukeppnunum.

Nú er aftur á móti á áætlun að ræða um framtíð Þjóðadeildarinnar og hvort mögulega sé bara eina vitið að fresta henni eða flauta hana alveg af.

Þetta var önnur Þjóðadeildin í röðinni og hún var sett á laggirnar á sínum tíma til að koma í staðinn fyrir vináttulandsleiki landsliðanna. Portúgal vann fyrstu keppnina sumarið 2019 og íslenska landsliðið hélt sæti sínu í A-deildinni eftir að fjölgað var um fjögur lið í henni.

Íslenska landsliðið lenti í mjög flottum riðli í Þjóðadeildinni 2020-21 því í riðli Íslands í A-deildinni voru England, Danmörk og Belgía.

Íslenskt knattspyrnuáhugafólk var sérstaklega spennt fyrir enska landsliðinu en Þjóðadeildin átti einmitt að byrja á því að Englendingar mættu á Laugardalsvöllinn í byrjun september.

Það verður líklegra með hverjum deginum að draumurinn um að fá enska landsliðið á Laugardalsvöllinn sé mögulega að deyja á þessum fundi á mánudaginn. Það er nefnilega farið að stefna í það að Þjóðadeildin verði hreinlega flautuð af til að búa til nauðsynlegt pláss á leikjadagatalinu.

Næsti fundur framkvæmdanefndar UEFA er 27. maí þar sem hún mun ræða meðal annars fyrirkomulagið á Meistaradeildinni og Evrópudeildinni. Það er búist við því að þar verði einnig tekin ákvörðun um undankeppni Evrópukeppna félagsliða á næstu leiktíð sem líklegast verða flautaðar af.

Deildirnar í löndunum hafa til 25. maí til að tilkynna UEFA hvernig og hvort þau ætli að klára sínar deildir. Þá þurfa þau einnig að gera grein fyrir því hvernig liðin úr þeirra deildum tryggja sig inn í Evrópukeppnina á næstu leiktíð.