„Það verður enginn 110 þúsund punda Jesse Lingard lengur til í heiminum“

Hjörvar Hafliðason sparkspekingur segir að eftir kórónuveirufaraldurinn muni bestu leikmenn heims halda áfram að fá ansi vel borgað fyrir að spila knattspyrnu en meðalleikmenn muni þurfa að taka á sig ansi miklar launalækkanir.

Mörg félög í Evrópu berjast í bökkum þessa daganna en faraldurinn hefur gífurleg áhrif á félög víðast hvar í heiminum. Það er þó eitthvað jákvætt við þetta að mati Hjörvars sem sér hag í því að meðalleikmenn, til að mynda Jesse Lingard hjá Manchester United, muni ekki lengur fá ansi myndarlega samninga.

„Það sem mun gerast í fótboltanum núna er að þessir bestu munu halda áfram að fá glórulausan pening. Sama hvort að hann heiti Neymar, Ronaldo, Messi, Salah og allir þessir kallar,“ sagði Hjörvar og hélt áfram:

„Það sem mun hins vegar gerast sem ég tel nokkuð jákvætt er að meðalleikmenn eiga eftir að taka gott dropp. Það verður enginn 110 þúsund punda Jesse Lingard lengur til í heiminum eða hvað sem þessir gæjar heita.“

„Þar hefur orðið glórulaus verðbólga á markaðnum. Ég held að þessir bestu muni fá áfram þessi súperlaun en ef ég vonast að eitthvað komi réttlæt út úr þessu þá vil ég að svona leikmenn sem eru fínir fái góða lækkun. Ég finn ekkert til með þeim og þeir eiga ekki skilið þessa stóru samninga.“