Helgi: Við ráðumst á bráðina þegar tækifæri gefast til

„Við komum ákveðnir til leiks og vorum komnir tveimur mörkum yfir snemma. Við gáfum aðeins eftir og þeir voru hættulegir í föstum leikatriðum. Við löguðum það í hálfleik og heilt yfir vorum við mun betra liðið inni á vellinum og fengum fullt af færum. Það var svekkjandi að fá á sig markið í lokin en við erum ánægðir með 5-1 sigur,“ sagði Helgi Sigurðsson þjálfari ÍBV eftir sigurinn örugga gegn Grindavík í Mjólkurbikarnum.

Eyjaliðið leit mjög vel út í leiknum, vel spilandi og mikil barátta og vilji hjá leikmönnum.

„Ég er mjög sáttur og þetta kom mér ekkert á óvart. Við erum búnir að vera svona í allan vetur og það er kraftur í okkur og hungur, ekki bara í þeim 11 sem byrja heldur í öllum hópnum og það eru allir tilbúnir að sanna sig.“

„Við erum klárir í þetta og vildum sýna okkar fólki og okkur sjálfum að við ætlum okkur að koma sterkir inn í tímabilið og mæta með gott sjálfstraust inn í Íslandsmótið um næstu helgi.“

Aðspurður sagðist Helgi ekki hafa áhyggjur af því að erfitt yrði að halda mönnum á jörðinni eftir þennan sigur.

„Það verður þá bara að koma í ljós hvort það verður erfitt eða ekki, það hefur allavega ekki verið það hingað til. Menn eru bara hungraðir og vilja meira og meira. Við ráðumst bara á bráðina þegar tækifæri gefast til.“

„Við fögnum vel í dag en næst er bara Íslandsmótið gegn Magna og við fáum ekkert þar fyrir það sem við gerðum hér. Við þurfum að sýna aðra eins frammistöðu til að fá eitthvað út úr þeim leik,“ sagði Helgi að lokum.