Gústi Gylfa: Stíflan er brostin

Grótta sigraði Fjölni í Grafarvogi í dag 3-0 og var það fyrsti sigur Gróttu í sumar og þeirra fyrsti í efstu deild frá upphafi. 

„Við stigum stórt skref í síðasta leik, fullt af mörkum og eitt stig til okkar. Við fylgdum því eftir með frábærum sigri hér á Fjölnisvelli og ég er gríðarlega stoltur af liðinu,“ sagði Ágúst Gylfason þjálfari Gróttu eftir fyrsta sigur Seltirninga í efstu deild frá upphafi.

„Við lögðum þetta 100% upp, leikmennirnir stóðu sig frábærlega vel og stuðningurinn var geggjaður. Þetta var okkar dagur.“

Fyrri hálfleikur var nokkuð jafn þó svo að Grótta væri hættulegri aðilinn. Í síðari hálfleik keyrðu gestirnir hinsvegar yfir Fjölnismenn.

„Leikplanið var gott og virkaði. Sóknarleikurinn var góður, varnarleikurinn góður. Það var frábært að halda hreinu því við höfum fengið mikið af mörkum á okkur, 12 mörk hingað til. Gott að halda hreinu. Það var mikilvægt í lokin að klára það og við gerðum það vel.“

Grótta skoraði ekki í fyrstu þremur leikjum sínum í Pepsi Max-deildinni en hafa hinsvegar skorað sjö mörk í þeim síðustu tveimur, fjögur gegn HK og nú þrjú gegn Gróttu.

„Stíflan er brostin. Við erum búnir að finna mark andstæðinganna. Ætli það sé ekki bara málið,“ sagði Ágúst og glotti þegar hann var spurður hvort svartar spár ýmissa sérfræðinga um markaleysi hefðu kveikt í liðinu.

„Erum við ekki búnir að svara því vel?,“ sagði Ágúst.

Með sigrinum fer Grótta úr fallsæti en Ágúst var ekkert kominn of langt í huganum.

„Þrátt fyrir að við fögnum þessum sigri þá erum við ekki orðnir neinir heimsmeistarar, það er ljóst. Við þurfum að halda áfram og á þessari braut þá getum við náð okkar markmiðum.“