Sérhannaði VW bíllinn hennar Söru er með 300 hestöfl

CrossFit konan Sara Sigmundsdóttir gerði samning við Volkswagen umboðið í miðjum kórónuveirufaraldri og hluti af þessum samningi var að fá sérhannaðan bíl. Sara er nú komin með lyklana í hendurnar.

Sara Sigmundsdóttir var valin til að vera sendiherra Volkswagen R bílsins í vor. Sara var valin af því að hún þykir vera mjög góð fyrirmynd góðra kosta eins og að hafa gott úthald en geta einnig tekist á við fjölbreytt og krefjandi verkefni.

„Ég er fyrsta manneskjan í CrossFit til að fá svona risafyrirtæki til að styrkja mig og vera sendiherra fyrir Volkswagen. Þetta er svakalegt,“ sagði Sara Sigmundsdóttir eftir að hún gerði samninginn sinn.

„Mér finnst þetta ekki vera ég og er ennþá bara í skýjunum yfir þessu. Ég er sú fyrsta til að fá bílastyrktaraðila í CrossFit heiminum,“ sagði Sara. Það var í apríl og í gær sótti hún bílinn sem var hluti af samningnum.

„Sérhannaði Volkswagen T-ROC R bílinn minn er kominn og ég var að koma frá því að sækja hann. Hann er allt sem ég vonaðist eftir og meira,“ skrifaði Sara á Instagram síðuna sína.

„Fyrir utan að vera rosalega fallegur þá er þetta einnig kraftmesti bíllinn sem ég keyrt. Hann er með 300 hestafla vél en samt svo léttur og auðveldur í akstri. Þetta er fullkominn bíll fyrir minn lífsstíl og hann er líka fullkomin fyrir hið harðgerða landslag hér á Íslandi,“ sagði Sara.

„Hann er með drif á öllum hjólum og er aðeins hærri en venjulegir bílar. Þegar veturinn kemur hingað þá þarf ég ekki að hafa áhyggjur af neinu heldur,“ sagði Sara.

„Ég hlakka til komandi vikna þar sem ég hef planað að eyða miklum tíma utandyra. Á suma staðina er aðeins hægt að koma með því að keyra slæma malarvegi. Það verður ekkert vandamál fyrir mig á þessum bíl,“ sagði Sara.

Það er spurning hvort fleiri vilji nú fá svona bíl eins og Sara ekur og þá hlýtur að vera nóg að biðja um Söru bílinn í umboðinu.