Telja Rússa standa að upplýsingafalsi um faraldurinn

Rússneska leyniþjónustan er sögð dreifa fölskum upplýsingum um kórónuveiruheimsfaraldurinn á enskumælandi vefsíðum sem beint er að fólki í Bandaríkjunum og öðrum vestrænum ríkjum, að sögn bandarískra embættismanna. Áróðurinn er sagður ýmist upphefja Rússland eða gera lítið úr Bandaríkjunum.

Verulega hefur borið á alls kyns upplýsingafalsi um flest það sem tengist kórónuveiruheimsfaraldurinn, ekki síst á samfélagsmiðlum og netinu. Nú segja bandarískir embættismenn AP-fréttastofunni að tveir einstaklingar sem vitað er að hafi verið hátt settir innan rússnesku herleyniþjónustunnar GRU beri ábyrgð á áróðursherferð sem beinist að vestrænum ríkjum.

Vefsíðurnar sem þeir tengjast hafi birt um 150 greinar um viðbrögð við faraldrinum frá því seint í maí og fram í byrjun júlí. Þar á meðal voru umfjallanir um að rússnesk stjórnvöld hefðu veitt Bandaríkjunum umfangsmikla neyðaraðstoð til að glíma við faraldurinn þar og að kínversk stjórnvöld telji kórónuveiruna líffræðilegt vopn.

Rússneskir embættismenn hafna ásökununum og segja þær „samsæriskenningar“ og „þráláta fælni“ í garð Rússlands. Ein af vefsíðunum sem Bandaríkjastjórn telur á vegum GRU birti grein þar sem því var alfarið hafnað að hún hefði tengsl við herleyniþjónustuna eða dreifði áróðri.

Fullyrðingar „þvættaðar“ í gegnum aðra miðla

Síðurnar sem um ræðir eru skráðar í nafni InfoRos í Rússlandi. Villandi og röngum upplýsingum er dreift á vefsíðum eins og InfoRos.ru, Infobrics.org og OneWorld.press. Greinarnar á síðunum eru sagðar skrifaðar á góðri ensku en með rússneskri slagsíðu. 

Upplýsingarnar sem þar birtast fara stundum í gegnum aðrar fréttaveitur til að fela uppruna þeirra og veita fullyrðingunum aukið lögmæti. Líkja bandarískir embættismenn því ferli við peningaþvætti. Í sumum tilfellum endurbirta síðurnar efni sem hefur birst annars staðar.

Bandarískir embættismenn staðhæfa ekki hvort að áróðrinum sé ætlað að hafa áhrif á forsetakosningarnar sem fara fram í nóvember. Nýlega hafa þó birst greinar þar sem fullyrt er að meint hneyksli stigmagnist nú í kringum Joe Biden, fyrrverandi varaforseta og væntanlegan forsetaframbjóðanda Demókrataflokksins.

Starfshópur Evrópusambandsins sagði í fyrra að One World væri nýjasta viðbótin í hóp upplýsingafalsmiðla sem njóta stuðnings stjórnvalda í Kreml. Síðan endurómi gjarnan línu rússneskra stjórnvalda um ýmis málefni, þar á meðal stríðið í Sýrlandi.

Meintar aðfarir Rússa nú eru taldar minnar óþyrmilega á þær sem þeir eru taldir hafa beitt í aðdraganda forsetakosninganna í Bandaríkjunum árið 2016. Þá héldu þeir úti svonefndri „tröllaverksmiðju“, hópi fólks sem hafði þann starfa að skrifa og dreifa áróðri til að ala á sundrung í bandarísku samfélagi. Bandaríska leyniþjónustan taldi að fyrir Rússum hafi vakað að hjálpa Donald Trump að ná kjöri sem forseti.

Bresk þingnefnd skilaði skýrslu í síðustu viku þar sem þarlend stjórnvöld voru gagnrýnd harðlega fyrir að rannsaka ekki vísbendingar um að Rússar reyndu að hafa afskipti af þjóðaratkvæðagreiðslum um sjálfstæði Skotlands árið 2014 og útgönguna úr Evrópusambandinu tveimur árum síðar.