Íslendingar tóku þátt í greftri lengstu og dýpstu bílaganga heims undir sjó

Norðmenn hafa tekið í notkun lengstu og dýpstu neðansjávarbílagöng heims. Tugir Íslendinga unnu að verkefninu á vegum ÍAV, en systurfélag þess var aðalverktaki. Fjallað var um göngin í fréttum Stöðvar 2. 

Göngin liggja undir Boknafjörð milli Stafangurs og Sólbakka í Ryfylki og voru opnuð fyrir umferð daginn fyrir gamlársdag, þann 30. desember. Gervihiminn er hafður í loftinu en göngin eru 14,4 kílómetrar á lengd og ná 292 metra undir yfirborð sjávar, sem gerir þau að lengstu og dýpstu bílagöngum heims undir sjó.

Til samanburðar ná Hvalfjarðargöng 165 metra undir yfirborð og eru 5,7 kílómetra löng.

Ryfylkisgöngin eru fjögurra akreina, með tvær akreinar í hvora átt, og kostuðu 8,1 milljarð norskra króna, andvirði 112 milljarða íslenskra króna. Vegtollum er ætlað að greiða þrjá fjórðu hluta kostnaðar en veggjald fyrir staka ferð fólksbíls er um 1.600 krónur íslenskar.

Íslendingar áttu stóran þátt í gerð ganganna undir stjórn Gísla Þórs Guðjónssonar, þáverandi staðarstjóra ÍAV, en systurfélag Íslenskra aðalverktaka í Noregi, Marti IAV, var aðalverktaki. Framkvæmdir hófust árið 2012 og unnu tugir Íslendinga að gangagerðinni framan af en þeim fækkaði eftir að íslenski markaðurinn fór að rétta úr kútnum, að sögn Sigurðar Ragnarssonar, forstjóra ÍAV. Nokkrir Íslendingar unnu þó að verkinu allt til loka.

Norðmenn eru raunar að grafa önnur og ennþá lengri og dýpri neðansjávargöng, Rogfastgöngin, sem verða 27 kílómetra löng og 392 metra djúp. Þau verða undir Boknafjörð utanverðan og tengja Stafangur við eyjarnar Kvitsey og Bokn. Þau eiga að verða tilbúin árið 2026.

Sjá hér nánar: Norðmenn ætla að grafa lengstu og dýpstu neðansjávarjarðgöng heims fyrir bílaumferð

Með þeim verður komið á ferjulausri vegtengingu milli Stafangurs og Haugasunds, sem er liður í því verkefni stjórnvalda að gera þjóðveginn um vesturströnd Noregs, E-39, ferjulausan. 

Hér má sjá frétt Stöðvar 2: