Óútreiknanlegt veðrið gerir upplifunina einstaka

Basalt arkitektar hafa haft mikil áhrif á baðmenningu á Íslandi með einstökum náttúruböðum víða um landið. Basalt hlaut meðal annars Hönnunarverðlaun Íslands fyrir framlag sitt. 15 arkitektar og hönnuðir mynda teymið hjá Basalt sem stofnað var af Sigríði Sigþórsdóttir fyrir rúmum tíu árum síðan.

Arkitektinn Marcos Zotes er hluti af þessu teymi sem staðsett er í Reykjavík en hann hélt fyrirlestur á hönnunarvikunni í Stokkhólmi á dögunum.  Hann fór meðal annars yfir hönnunarferlið og það hvernig fyrirtækið teiknaði náttúruböð þar sem íslenska náttúran fær að njóta sín. Þar talar hann meðal annars um þau áhrif sem veðrið hér á landi getur haft á heimsóknir fólks í náttúruböðin.

Dezeen tók upp erindið og má horfa á það í spilaranum hér að neðan. Á meðal þeirra verkefna sem Basalt arkitektar hafa unnið tengd jarðhita er spa hluta Bláa lónsins og einnig Retreat hótelið í sömu byggingu, Guðlaug á Akranesi, Geasea sjóböðin á Húsavík, Vök baths við Egilsstaði, sundlaugin á Hofsósi og svona mætti lengi telja. Einnig hefur Basalt hannað sýningar, einbýlishús, hjúkrunarheimili, skóla og aðrar byggingar í samstarfi við verkfræðistofur og stofnanir.

Spa hluti Bláa lónsins var byggður upp þannig að gestir fá einkaklefa, afnot af húðvörum Bláa lónsins og fleira. Umhverfið á að sýna Bláa lónið í sinni fallegustu mynd. Markmiðið var að spa upplifunin væri einstök og að fólk myndi finna þar friðsæld og vellíðan. Hefur spa hluti lónsins meðal annars verið valinn  „Ultimate Mind-Blowing Spa“ hjá British Airways. 

Fyrsta fimm stjörnu hótelið á Íslandi sem Basalt tók þátt í að hanna við Bláa lónið hefur hlotið fjölda verðlauna og viðurkenninga. Það vann meðal annars verðlaunin besta Arkitektúr verkefni ársins 2019 í Architecture Masterpriz og var einnig besta „resort“ hótelið á AHEAD Europe 2019. 

Hönnunin hlaut einnig the German Design Award og lesendur National Geographic kusu það nýlega besta „destination“ hótel heims. Dezeen lesendur völdu hótelið eitt af 20 bestu verkefnum ársins og Basalt arkitektar komust á topp tíu listann yfir bestu arkitektarstofurnar. Hótel heilsulind Bláa Lónsins var árið 2018 valið einn af hundrað bestu stöðum heimsins Samkvæmt Time Magazine. 

Hótelið var þungamiðja umfjöllunar Bloomberg-fréttastofunnar um „leynileg hótelherbergi“ sem finna má víða um heim. Eitt slíkt herbergi er að finna á The Retreat-hótelinu. Um er að ræða næstum 200 fermetra lúxussvítu en nóttin á herberginu kostar 10.500 dali, rúmlega 1.1 milljón króna, og ekki má bóka það í styttri tíma en tvær nætur.

Geosea sjóböð á Húsavíkurhöfða var á síðasta ári á lista TIME yfir hundrað bestu áfangastaði heims. Vatnið í böðunum kemur úr tveimur borholum sem ekki tókst að nýta sökum sjávarseltu en hafa nú fengið nýjan tilgang. 

Basalt hannaði einnig Vök baths náttúrulaugarnar á bökkum Urriðavatns í útjaðri Egilsstaða, Instagram vinsælu sundlaugina á Hofsósi og Guðlaugu á Akranesi sem er vinsæll baðstaður heimamanna og ferðamanna. Guðlaug – heit laug í grjótvörn við Langasand á Akranesi hlaut í desember Umhverfisverðlaun Ferðamálastofu árið 2019.  

Sýning þeirra, Lava eldfjalla- og jarðskjálftamiðstöðin á Hvolsvelli, hlaut árið 2018 hin virtu Red Dot verðlaun en þetta eru ein eftirsóttustu hönnunarverðlaun sem veitt eru.

„Við á Basalt arkitektum vinnum ávallt með hvert og eitt verkefni út frá eðli þess og staðsetningu. Okkar fyrsta verk er að fara á staðinn og kynna okkur staðhætti og menningarsögu viðkomandi staðar. Við leitum fanga í umhverfinu og náttúrunni hverju sinni,“ sagði Sigríður Sigþórsdóttir stofnandi Basalt arkitekta þegar stofan tók við Hönnunarverðlaunum Íslands 2018 fyrir arkitektúr í baðmenningu á Íslandi. Verðlaunin voru veitt fyrir Sjóböðin á Húsavík og Retreat Hotel í Bláa lóninu.

„Við erum að umbreyta náttúru og nánasta umhverfi og leggjum áherslu á að það sé í sátt; í stað átaka verði til leikur sem eykur gæði staðarins; geri hann aðgengilegan og áhugaverðan. Við höfum að leiðarljósi að ekkert jafnast á við íslenska náttúru til að öðlast sálræna endurheimt svo ég vitni í Pál Líndal umhverfissálfræðing,“ sagði Sigríður einnig við þetta tilefni.

Í rökstuðningi dómnefndar voru Basalt arkitektar sagðir hafa einstakt lag á að tvinna mannvirki saman við náttúruna. Þeir hafi sýnt gott fordæmi þegar kemur að hönnun baðstaða. Byggingarlistin sé í hæsta gæðaflokki þar sem hvert smáatriði er úthugsað og rými hönnuð af virðingu og látleysi.

Það eru mörg verkefni í vinnslu hjá Basalt í augnablikinu. Basalt arkitektar er eitt af fimm teymum sem var valið fyrir samkeppni um hönnun brúar yfir Fossvog.  Eins og fjallað hefur verið um á Vísi áætlar Basalt svo að ljúka framkvæmdum árið 2022 á Fjallaböðunum í Þjórsárdal. 

Forsætisráðherra veitti í nóvember samþykki sitt fyrir því að Skeiða- og Gnúpverjahreppur gangi til samninga um uppbyggingu hótels í hlíðum Rauðakambs í Þjórsárdal innan þjóðlendu sem nefnist Búrfells- og Skeljafellssvæði. Ætlunin er að reisa 5.000 fermetra hótelbyggingu og baðaðstöðu sem geti rúmað á bilinu 40 til 45 herbergi eða um hundrað gesti.

Sjá einnig: Milljarða króna uppbygging í Þjórsárdal með fjallaböðum og hóteli inni í fjalli 

Í augnablikinu vinna Basalt arkitektar líka að verkefninu FABRIC fyrir Lágmúla sem var valið í samkeppninni Re-inventing Cities um grænar þróunarlóðir.

Keppnin er haldin á vegum samtakanna C40 en í þeim eru borgir sem sækja fram í baráttunni gegn loftslagsbreytingum. Keppnin snýst um að þverfagleg teymi móti framtíðarsýn fyrir lóðirnar með það að meginmarkmiði að þar rísi fyrirmyndarbygging í sjálfbærni.