Katy Perry opinberar óléttu í nýju tónlistarmyndbandi

Tónlistarkonan Katy Perry tilkynnti í morgun að hún ætti von á barni með leikaranum Orlando Bloom, unnusta hennar. Perry beitti heldur óhefðbundinni leið til að opinbera óléttuna en það gerði hún í nýju tónlistarmyndbandi.

Perry staðfesti óléttuna svo á Instagram þar sem hún sagðist spennt og að von væri á barninu í sumar. Það væri um svipað leyti og American Idol, þar sem hún er dómari, verður í beinni útsendingu.

Lagið sem Perry notaði til að opinbera óléttuna ber nafnið Never Worn White og fjallar um samband hennar og Bloom. Í myndbandinu er ýmsum leiðum beitt til að sýna ekki óléttubumbu Perry, þar til í blálokin.

Perry og Bloom ætluðu að gifta sig í desember en frestuðu því fram á þetta ár. Þetta er fyrsta barn Perry en Bloom á níu ára son fyrir með fyrirsætunni Miranda Kerr.

Söngkonan fjallaði einnig um tilkynninguna á Twitter og þar sagðist hún glöð yfir því að þurfa ekki lengur að halda maganum inni eða bera stærðarinnar veski.