Enskir landsliðsmenn hlupu á hvor annan á æfingu á Laugardalsvellinum

Tveir til viðbótar úr enska landsliðshópnum voru næstum því úr leik eftir æfingu enska landsliðsins í Laugardalnum í gær.

Englendingar voru örugglega fegnir að komast í burtu frá Íslandi í gær eftir að hafa rétt marið vængbrotið íslenskt landslið á laugardaginn og þurft síðan að henda tveimur ungstirnum úr hópnum eftir brot á sóttvarnarreglum.

Enska landsliðið æfði á Laugardalsvellinum áður en liðið flaug til Kaupmannahafnar seinni partinn.

Ensku landsliðsmennirnir Danny Ings og Kieran Trippier eru báðir sagðir leikfærir á móti Dönum þrátt fyrir skrautlegt samstuð á æfingu á Laugardalsvellinum.

Sky Sports sýndi myndband af samstuðinu á samfélagsmiðlum eins og sjá má hér fyrir neðan.

Þeir Danny Ings og Kieran Trippier voru í sprettæfingu en einhver misskilningur kom upp þannig að þeir hlupu á hvor annan. Það lítur út fyrir að Danny Ings hafi verið sökudólgurinn með því að hlaupa í vitlausa átt.

Ings og Trippier fundu örugglega vel fyrir þessu en varð að öðru leyti ekki meint af þessum samstuði.