ÍBV fær einn af tengdasonum Vestmannaeyja

ÍBV hefur fengið línumanninn Svein José Rivera að láni frá Aftureldingu og gildir samningurinn til loka nýhafins keppnistímabils í Olís-deildinni í handbolta.

Sveinn er 22 ára gamall og uppalinn hjá Val en hefur einnig leikið með Gróttu. Hann lék með Aftureldingu á síðustu leiktíð og skoraði 37 mörk í 20 deildarleikjum.

Á Facebook-síðu ÍBV er bent á að Sveinn sé einn af „tengdasonum Vestmannaeyja“ þar sem hann sé unnusti Þóru Guðnýjar Arnarsdóttur sem sneri heim til Eyja nú í haust frá Aftureldingu. Þau hafi nýverið keypt sér hús í Eyjum.