Arnar áfram með KA

Arnar Grétarsson verður áfram þjálfari KA en hann hefur skrifað undir tveggja ára samning við félagið.

Arnar tók við KA af Óla Stefáni Flóventssyni í júlí. Hann hefur stýrt KA í þrettán leikjum í Pepsi Max-deildinni. KA-menn hafa unnið þrjá af þessum leikjum, gert níu jafntefli og aðeins tapað einum, gegn toppliði Valsmanna. KA er í 7. sæti deildarinnar með 21 stig.

Í frétt á heimasíðu KA fagnar Hjörvar Maronsson, formaður knattspyrnudeildar félagsins, því að halda Arnari.

„Ég er bæði ánægður og stoltur með þessa niðurstöðu. Arnar er afar metnaðarfullur og einstaklega faglegur í allri sinni vinnu og viðhorfi til félagsins. Það ríkir mikil ánægja með hans störf meðal leikmanna okkar sem og allra KA manna. Við væntum þess að Arnar haldi áfram að móta liðið sem og einstaka leikmenn okkar en innan félagsins er, auk reynslubolta okkar, fjöldinn allur af efnilegum metnaðarfullum strákum sem bíða þess að bera uppi framtíðar lið okkar KA manna. Að öllu þessu sögðu tel ég að samkomulag okkar við Arnar Grétarsson séu frábærar fréttir til stuðningsmanna KA og sýni best metnað félagsins í því að ná sífellt meiri árangri. Þessi metnaður er afskaplega ríkur í félaginu öllu og því gaman að vera KA maður.“

Arnar stýrði áður Breiðabliki og Roeselare í Belgíu. Þá var hann yfirmaður knattspyrnumála hjá AEK Aþenu og Club Brugge.