Ronaldo með kórónuveiruna

Cristiano Ronaldo hefur greinst með kórónuveiruna. Portúgalska knattspyrnusambandið staðfesti þetta í dag.

Ronaldo hefur yfirgefið portúgalska landsliðshópinn til að fara í einangrun. Hann verður því ekki með Portúgal gegn Svíþjóð í Þjóðadeildinni annað kvöld.

Samkvæmt portúgalska sambandinu er Ronaldo einkennalaus sem stendur og líður vel. Allir leikmenn portúgalska hópsins fóru í skimun í dag og var það aðeins Ronaldo sem greindist með smit.

Ronaldo skoraði bæði mörk Portúgala þegar þeir unnu Svía í Svíþjóð fyrr í haust. Leikur liðanna á morgun verður sýndur beint hér á Vísi.