Sautjánda andlátið vegna Covid-19

Einn sjúklingur lést á síðasta sólarhring á Landspítala vegna Covid-19. Frá þessu er greint á vef spítalans þar sem aðstandendum hins látna er vottuð samúð. Hinn látni var á tíræðisaldri samkvæmt upplýsingum frá almannavörnum.

Er þetta sautjánda andlátið vegna Covid-19 hér á landi frá upphafi faraldursins. Tíu létust í fyrstu bylgju faraldursins og nú hafa sjö látist í þessari bylgju sem nú gengur yfir.

Tveir létust um liðna helgi og þá var tilkynnt um eitt andlát í gær.

Fréttin hefur verið uppfærð.