Anton tvisvar í fjórða sæti

Anton Sveinn McKee safnaði samtals 21 stigi fyrir lið Toronto Titans í Meistaradeildinni í sundi í Búdapest í dag þegar hann keppti í tveimur greinum.

Anton synti 100 metra bringusund á 57,71 sekúndum og varð í 4. sæti sem skilaði liði hans fimm stigum. Hann var nokkuð frá nýju Íslands- og Norðurlandameti sínu frá því fyrir tveimur vikum, sem er 56,30 sekúndur.

Seinni grein Antons í dag var 50 metra bringusund með útsláttarfyrirkomulagi. Átta keppendur tóku þátt, líkt og í öðrum greinum, og komust fjórir fljótustu áfram í undanúrslit. Anton var einn þeirra eftir að hafa synt á 26,34 sekúndum sem var þriðji besti tíminn og skilaði sex stigum. Í undanúrslitum synti Anton á 26,66 sekúndum, varð fjórði og fékk fimm stig til viðbótar. Hann var 61/100 úr sekúndu frá því að komast í tveggja manna úrslitin. Emre Sakci úr liði Iron stóð að lokum uppi sem sigurvegari á 25,57 sekúndum.

Titans voru að keppa á sínu þriðja móti af fjórum sem hvert lið tekur þátt í í þessari sérstöku Covid-útgáfu af Meistaradeildinni, sem fer öll fram í Búdapest. Liðið endaði í 3. sæti að þessu sinni með 391 stig, á eftir Energy Standard (613 stig) og Iron (448 stig). DC Trident (256 stig) hafnaði í 4. og neðsta sæti.

Anton og hans lið keppir næst á móti 9.-10. nóvember en það er síðasta mót liðsins fyrir undanúrslitin. Þangað komast átta efstu liðin en Titans eru sem stendur í 6. sæti með 7 stig eftir þrjú mót (4 stig fást fyrir efsta sæti, 3 fyrir 2. sæti, 2 fyrir 3. sæti og 1 fyrir neðsta sæti á hverju móti).