Lyon enn með fullt hús stiga

Frakklands- og Evrópumeistarar Lyon unnu 5-1 sigur í frönsku úrvalsdeildinni í dag. Er liðið með átta sigra eftir átta leiki og stefnir í enn einn titilinn. 

Lyon fékk Soyaux í heimsókn í dag og segja má að leikurinn hafi verið frekar mikil einstefna frá upphafi til enda. Staðan var enn markalaus eftir tuttugu mínútna leik, á næstu sjö mínútum skoraði Lyon hins vegar tvívegis.

Dzsenifer Marozsán skoraði fyrsta mark leiksins og Wendie Renard bætti við öðru marki á 27. mínútu leiksins er hún fylgdi eftir að hafa klikkað sjálf á víti. Nikita Parris skoraði þriðja mark Lyon fyrir lok fyrri hálfleiks og leik því raunar lokið þó enn væru 45 mínútur eftir.

Rachel Avant minnkaði muninn er tíu mínútur voru liðnar af síðari hálfleik. Parris bætti hins vegar við öðru marki sínu og fjórða marki Lyon aðeins sex mínútum síðar, staðan þá 4-1.

Kadeisha Buchanan skoraði svo fimmta mark Lyon áður en leiknum lauk, lokatölur 5-1 og Lyon á toppi deildarinnar með 24 stig að loknum átta leikjum. PSG er hins vegar aðeins fimm stigum á eftir toppliðnu og með leik til góða.

Landsliðsfyrirliðinn Sara Björk Gunnarsdóttir spilaði allan leikinn á miðju Lyon í kvöld.