Þrír til æfinga hjá félaginu sem mótar íslenskar stjörnur

Sænska knattspyrnufélagið Norrköping hefur horft mikið til Íslands eftir ungum og efnilegum leikmönnum síðustu ár og uppskorið ríkulega. Nú eru tveir Skagamenn til reynslu hjá félaginu og markvörður Gróttu á leiðinni.

Norrköping hefur fyrst og fremst átt í sterku sambandi við ÍA og í gegnum það samband kom Arnór Sigurðsson sem var svo seldur áfram til CSKA Moskvu fyrir metfé í sögu Norrköping, eða jafnvirði um hálfs milljarðs íslenskra króna. Nú er Ísak Bergmann Jóhannesson í sigti bestu knattspyrnufélaga heims og gæti farið fyrir enn hærri upphæð, og Oliver Stefánsson er einnig hjá félaginu.

Í haust hefur Norrköping meðal annars fengið hinn 15 ára gamla Jóhannes Kristin Bjarnason til reynslu frá KR, en þeir Ísak eru bræðrasynir, sem og jafnaldra hans Robert Quental Árnason frá Leikni R..

Ætlar sér ekki að spila í Lengjudeildinni

ÍA greindi svo frá því um helgina að Jón Gísli Eyland Gíslason og Guðmundur Tyrfingsson væru farnir til reynslu hjá Norrköping, og í Morgunblaðinu í dag greinir Hákon Rafn Valdimarsson, markvörður Gróttu, frá því að hann fari á fimmtudaginn til reynslu hjá félaginu.

„Þeir fylgdust með mér í allt sumar og vilja fá að skoða mig betur núna. Ég verð úti í viku og það verður virkilega gaman að fá að æfa með Norrköping,“ sagði Hákon við Morgunblaðið.

Hákon kvaðst gera sér grein fyrir því að hann fengi ekki endilega samning hjá Norrköping, en hann stefnir ekki á að spila í Lengjudeildinni með Gróttu sem féll úr Pepsi Max-deildinni. „Ég vil spila áfram í efstu deild en hvort af því verður þarf að koma betur í ljós.“