Birkir fékk loksins tækifæri með Brescia

Birkir Bjarnason spilaði sínar fyrstu mínútur með Brescia á leiktíðinni er Brescia gerði 2-2 jafntefli við Venezia á heimavelli í ítölsku B-deildinni.

Birkir var ekki í leikmannahópi Brescia í síðustu þremur leikjunum fyrir landsleikjahlé og virtist ekki myndinni en hann spilaði þrjá leiki með íslenska landsliðinu síðustu tíu daga.

Hann var kominn á bekkinn í dag og kom inn á er tuttugu mínútur voru eftir. Þá stóðu leikar 2-1 fyrir Venezia en jöfnunarmark Brescia kom í uppbótartíma. Hólmbert Aron Friðjónsson spilaði ekki með Brescia vegna meiðsla.

Óttar Magnús Karlsson kom inn á sem varamaður á 77. mínútu hjá Venezia og Bjarki Steinn Bjarkason var ekki í leikmannahópnum.

Venezia er í 5. sætinu á meðan Brescia er í því ellefta.