Hvað þarf til að Ísland spili á EM í Englandi?

Fagna Íslendingar EM-sæti á þriðjudaginn? Fer íslenska liðið í umspil? Verður EM-draumurinn kannski að engu í Ungverjalandi, í annað sinn á skömmum tíma?

Á íslensku má alltaf finna svar. Í stuttu máli má segja að íslenska kvennalandsliðið í fótbolta eigi mjög góða möguleika á að komast beint á EM í Englandi vinni það síðustu tvo leiki sína í undankeppninni. Það er þó ekki alveg öruggt eins og nánar er farið yfir hér að neðan. 

Ísland mætir Slóvakíu í bænum Senec í dag og svo Ungverjalandi í Újpest þriðjudaginn 1. desember.

Staðan í riðli Íslands er þannig að Svíþjóð er efst með 19 stig og hefur þegar tryggt sér efsta sætið og þar með farseðilinn til Englands. Ísland er í 2. sæti með 13 stig, Slóvakía með 10, Ungverjaland 7 og Lettland 0. Ungverjaland á aðeins eftir leik sinn við Ísland, og Slóvakía og Svíþjóð mætast í lokaumferðinni. Lettland hefur lokið keppni.

Leikið er í níu undanriðlum og komast þrjú lið með bestan árangur í 2. sæti beint á EM. Hin sex liðin fara í umspil um þrjú síðustu lausu sætin á EM, þar sem 16 lið taka þátt.

Slóvakía getur enn náð sætinu af Íslandi

Sem sagt, Ísland þarf í fyrsta lagi að tryggja sér 2. sæti. Til þess dugar að ná jafntefli gegn Slóvakíu í dag. Vinni Slóvakía þyrfti Ísland að ná í stig gegn Ungverjalandi í lokaumferðinni og hugsanlega að treysta á hjálp frá Svíum sem mæta Slóvökum. Elín Metta Jensen ræddi möguleika Íslands við Vísi í gær:

Ef Ísland nær 2. sæti má samt slá því föstu að liðið þurfi að fara í umspil ef það vinnur ekki leikina tvo sem það á eftir. Umspilið fer fram 5.-13. apríl á næsta ári og verður leikið heima og að heiman.

Hvað ef að Ísland vinnur báða leikina?

Vinnist leikirnir við Slóvakíu og Ungverjaland eru möguleikarnir hins vegar mjög góðir á að komast beint á EM, þó að ekkert sé öruggt.

Ísland væri þá með 19 stig og betri árangur en liðin í A-, C-, D- og I-riðli, en þyrfti að treysta á hagstæð úrslit í tveimur riðlum af þessum fjórum til viðbótar:

B-riðill: Ítalía endar í 2. sæti riðilsins. Íslandi dugar að vinna báða sína leiki til að gera betur en Ítalía nema að Ítalir vinni Ísrael á heimavelli og topplið Danmerkur á útivelli.

H-riðill: Sviss (19 stig) og Belgía (18 stig) eru efst og mætast í Belgíu á þriðjudaginn. Aðeins jafntefli þar gefur möguleika á að lið úr H-riðli komist á EM á kostnað Íslands. Belgía myndi þá enda í 2. sæti með 19 stig, með 11 mörkum betri markatölu en Ísland er með núna. Vinni Belgar enda Svisslendingar í 2. sæti með 19 stig og verri markatölu en Ísland, að því gefnu að Ísland vinni sína tvo leiki, og vinni Sviss enda Belgar með 18 stig í 2. sæti.

G-riðill: Þarna virðist minnst von fyrir Ísland. Frakkland og Austurríki eru jöfn með 16 stig, eiga tvo leiki eftir hvort og mætast í Frakklandi á morgun. Ef liðin gera jafntefli gæti liðið í 2. sæti endað með 20 stig, fyrir ofan Ísland. Vinni annað liðið er líklegt að hitt endi í 2. sæti með 19 stig og að minnsta kosti fimm mörkum betri markatölu en Ísland er með núna.

E-riðill: Enn á eftir að spila fjölda leikja í riðlinum því fjórum leikjum var frestað fram í febrúar vegna kórónuveirufaraldursins. Finnland, Portúgal og Skotland eru í baráttunni um efstu tvö sætin og er staðan mjög óljós, en gæti skýrst eftir leik Portúgals og Skotlands á morgun og leik Skotlands og Finnlands á þriðjudaginn.