Íbúar á Ítalíu lýsa ástandinu sem skelfilegu: Fjöldajarðarfarir og hinstu skilaboð gegnum snjalltæki

Ítölsk kona segir að vinir sínir sem starfa á spítölum hafi þurft að taka upp hinstu skilaboð frá deyjandi fólki í einangrun til ættingja sem var bannað að koma vegna Covid-19 sjúkdómsins. Íslensk kona búsett í Bergamo segir lækna hafa þurft að velja hverjir fái að lifa.

Tæplega 32.000 hafa veikst af Covid 19 á Ítalíu og um 2500 manns látist. Héraðið Bergamo hefur orðið hvað harðast úti, opinberar tölur segja að þar hafi um 4000 manns smitast og 400 látist. 

Mun fleiri hafi látist en opinberar tölur segja til um

Rut Valgarðsdóttir sem hefur búið í áraraðir á svæðinu og starfar við sjúkrahús þar telur töluna mun hærri.

„Opinberu tölurnar sem byggjast á tölum úr heilbrigðiskerfinu eru of lágar því það eru margir sem deyja heima. Þetta á í raun allt eftir að koma í ljós eftir að faraldrinum lýkur. Spítalinn hér er löngu sprunginn. Fjöldi sjúkrarúma á bráðadeildum hefur fjölgað gríðarlega. Nú er verið að koma upp bráðabirgðasjúkrahúsi við spítalann. Þá bíða sjúkrabílar í marga klukkutíma fyrir utan   með veikt fólk. Heilbrigðisstarfsfólk hefur líka verið að veikjast og sumir hreinlega þurft að vinna þó þeir séu smitaðir af því það vantar fólk. Fram hefur komið að fimmtungur  af öllum heimilislæknum í héraðinu er smitaður,“ segir Rut.

Rut segir að vinnufélagi sinn hafi misst tengdaföður sinn í gær úr Covid 19.

 Fjölskyldan þurfti að berjast fyrir því að koma honum á spítala. Hann var svo í einangrun í tvær vikur og lést í gær. Þetta var afar erfitt því fjölskyldan mátti ekki heimsækja hann allan tímann. Það hlýtur að vera skelfilegt að deyja einn á spítala með jafn veikt fólk allt í kringum sig,“ segir Rut. 

  Hún segir að borgarstjórinn í Bergmo hafi tilkynnt í síðustu viku að heilbrigðisstarfsfólk þurfi jafnvel að velja hverjir lifa og hverjir deyja úr sjúkdómnum.

„Því miður þurfa læknarnir stundum að velja . Fólk með undirliggjandi sjúkdóma kannsi einn til tvo er þá kannski  valið fram yfir þá sem hafa enga sjúkrasögu. Þetta er fólk sem hefði mögulega annars getað lifað í mörg ár,“ segir Rut. 

Fjöldajarðafarir

Rut segir að fólk fari ekki í jarðafarir enda útgöngubann og þekkir dæmi um jarðaför þar sem 50 manns voru jarðsungnir í einu.

Rut  hefur unnið heima frá því útgöngubann var sett á í landinu. Hún segir að það væsi ekki um sig og fjölskyldu sína en ástandið sé ógnvænlegt. 

„Ég trúði ekki að ástandið yrði svona skelfilegt og flestir sem ég þekki voru sömu skoðunnar áður en þetta brast á. Mig langar að benda Íslendingum á í lokin að fara varlega og fara eftir tilmælum heilbrigðisyfirvalda,“ segir Rut. 

Stríðsástand á spítulum

Licia Dallolio er búsett í Modena á Ítalíu og hefur verið heima í útgöngubanni í tæpar tvær vikur ásamt fjölskyldu sinni. Hún segir að vinir sínir sem starfi á spítölum lýsi stríðsástandi þar.  

„Ég þekki lækna sem eru með símana sína fulla af hinstu kveðjum frá deyjandi fólki til ættingja sinna sem mega ekki heimsækja það vegna smithættu. Þetta er líka gríðarlegt álag á heilbrigðisstarfólk hér.  Þá er mikið álag á  kirkjugörðum en flestir sem deyja úr sjúkdómnum eru brenndir. Þá eru haldnar fjöldajarðafarir því það eru svo margir sem hafa látist á stuttum tíma. Það er hins vegar engin ættingi nálægt því fjöldasamkomur eru bannaðar,“ segir Licia. 

 Licia segir að almenningur hafi tekið sig til og safnað fyrir snjalltækjum fyrir sjúklinga í einangrun svo þeir geti verið í sambandi við fólkið sitt.

„Það eru líka margar fallegar sögur í þessu ástandi. Fólk fer með gjafir og mat á spítalana eða reynir að gera eitthvað til að bæta ástandið hér. Stelpan mín bakaði t.d. köku í gær og bað mig að færa heilbrigðisstarfsfólki á spítalanum hér,“ segir Licia að lokum.