Pfizer farið að rukka fyrir sjötta skammtinn

Sænska blaðið Dagens Nyheter segir frá þessu. Flöskur Pfizer hafa til þessa verið fylltar með efni þannig að öruggt sé að hægt sé að blanda úr því rúmlega fimm skammta. Í ljós hefur komið að ef notast er við ákveðna gerð nála er hins vegar hægt að ná nægu magni úr flöskunum til að tryggja sjötta skammtinn.

Richard Bergström, sem á sæti í samninganefnd framkvæmdastjórnar ESB og hefur umsjón með dreifingu bóluefna frá Svíþjóð til Íslands og Noregs, segir í samtali við DN, að hærri reikningar frá Pfizer séu óásættanlegir. „Ef land er bara með möguleika á að ná fimm skömmtum, hafa fengist færri skammtar fyrir sama verð.“

Anders Tegnell, sóttvarnalæknir Svíþjóðar, segir að Lýðheilsustofnun Svíþjóðar muni nú ekki greiða reikningana frá Pfizer fyrr en samkomulag hefur náðst í deilunni. SVT hefur ekki náð í fulltrúa Pfizer vegna málsins.

Bólusetning með bóluefni Pfizer hófst á Íslandi þann 29. desember. Íslensk stjórnvöld hafa náð samningum við Pfizer um 250 þúsund skammta sem duga fyrir um 125 þúsund einstaklinga.