Vopnaðir menn reyndu að brjótast inn á Grensásvegi

Greint er frá málinu í dagbók lögreglunnar á höfuðborgarsvæðinu. Tilkynnt var um húsbrotið klukkan 21:11 í gærkvöldi en hvorki fylgir sögunni hvað mönnunum gekk til né hvernig þeir voru vopnaðir.

Töluvert var um útköll vegna hávaða í gærkvöldi og nótt. Ekki reyndust þó öll slík málin alvarleg. Skömmu fyrir klukkan 19:00 í gærkvöldi var tilkynnt um að „skrítin“ hljóð bærust frá íbúð í Hafnarfirði líkt og barn hefði öskrað. Í ljós kom að þar var fugl á ferðinni.

Skömmu fyrir klukkan 23:00 í gærkvöldi barst tilkynning um unglingapartý við Hvaleyrarvatn í Hafnarfirði þar sem væri opinn eldur. Sérstaklega hefur verið varað við hættu á gróðureldum undanfarna daga vegna viðvarandi þurrks og fólk hvatt til að fara gætilega með eld. Áætlað er að um tveir ferkílómetrar gróðurlendis hafi brunnið í Heiðmörk á þriðjudagskvöld.