Þjálfari Hjartar skrifaði skilaboð til leikmanna á tússtöflu í miðjum leik

Í stöðunni 2-1 fyrir Brøndby vildi Niels Fredriksen að sínir menn myndu halda áfram að sækja og brýndi það fyrir þeim með nokkuð sérstökum hætti.

Hann skrifaði skilaboðin „keep attacking“ á tússtöflu og stillti henni upp á hliðarlínunni. Til að leggja áherslu á skilaboðin tók hann töfluna svo upp og sýndi sínum mönnum hana.

 Skilaboð Fredriksens komust allavega áleiðis því Andrija Pavlovic kom Brøndby í 3-1 á 83. mínútu. Það urðu lokatölur leiksins.

Hjörtur Hermannsson lék allan leikinn í vörn Brøndby sem er einu stigi á eftir Midtjylland á toppi deildarinnar.

Mikael Neville Anderson kom inn á sem varamaður í liði Midtjylland þegar stundarfjórðungur var til leiksloka.

Midtjylland náði forystunni á 32. mínútu þegar gamli Stjörnumaðurinn Alexander Scholz skoraði úr vítaspyrnu. Mikael Uhre jafnaði fyrir Brøndby á 37. mínútu og þremur mínútum síðar var Paulinho, leikmaður Midtjylland, rekinn af velli.

Simon Hedlund kom Brøndby yfir á 70. mínútu áður en Pavlovic gulltryggði sigurinn eins og áður sagði.