Leyfi í höfn hjá Play og fyrsta flugvélin á leið til landsins

Í fréttatilkynningu frá Play kemur fram að flugrekstrarlefyið sé í höfn. Undanfarnar vikur hafi flugvirki á vegum Play verið í Houston í Texas að undirbúa nýja flugvél til afhendingar. Fleiri fulltrúar Play bættust í hópinn í vikunni til að taka vélina út fyrir íslenska skráningu sem lauk seint í gærkvöldi.

Við flugvélinni tóku Andri Geir Eyjólfsson forstöðumaður tæknideildar, Halldór Guðfinnsson og Friðrik Ottesen flugstjórar en undirbúningur að fyrsta flugi Play, á nýju flugrekstrarleyfi félagsins, er í fullum gangi að sögn Birgis Jónssonar forstjóra.

Flugvélin, TF-AEW sem er af gerðinni A321NEO, frá Airbus og árgerð 2018, fer nú í skýli þar sem hún verður máluð í einkennislitum PLAY. Að því loknu kemur vélin heim til Íslands og er þá tilbúin að hefja sig til flugs með farþega Play á fyrstu áfangastaði félagsins.

TF-AEW er fyrst þriggja systurvéla sem Play hefur tryggt sér frá AerCap, stærsta flugvélaleigusala í heimi. Vélar tvö og þrjú eru í innleiðingu og skráningu eins og stendur og koma einnig til landsins á næstu vikum samhliða stækkun leiðakerfis Play.

Birgir segir að það sé stjórnendum og stjórn Play mjög ofarlega í huga á þessum tímamótum að þakka frábæru starfsfólki sem hefur undanfarin tvö ár staðið þétt saman í þessu stóra verkefni.

„Hér er ótrúlegur andi. Við erum með frábært starfsfólk sem hefur unnið þrekvirki við fordæmalausar aðstæður þar sem unnið er af fagmennsku, gleði og virðingu. Fyrir tilvonandi viðskiptavini PLAY vil ég segja þetta, það er mikil tilhlökkun hjá okkur öllum að taka á móti ykkur um borð í nýlegar og hagkvæmar flugvélar okkar. Við ætlum að bjóða samkeppnishæf verð og einfalt ferðalag en þannig verðum við nauðsynleg viðbót við íslenskan flugmarkað,“ segir Birgir í tilkynningu.