Anna­söm Euro­vision-nótt hjá lög­reglu

Tveir voru stöðvaðir í Breiðholti í gærkvöldi og vegna hraðaksturs. Annar var stöðvaður eftir að hann mældist keyra á 92 kílómetra hraða á götu þar sem hámarkshraði er 60. Sá var einnig enn á nagladekkjum, sem hann verður sektaður fyrir. Hinn var stöðvaður á Breiðholtsbraut á 103 kílómetra hraða en þar er hámarkshraði 70.

Þrjú rafskútuslys komu inn á borð lögreglu, það fyrsta var tilkynnt á tólfta tímanum. Komið var þar að manni liggjandi utandyra í Vesturbæ og leiguhlaupahjól við hlið hans. Hann var töluvert blóðugur í andliti, efri vör hans var mjög bólgin og tvær tennur brotnar. Hlúð var að manninum á vettvangi.

Annað rafskútuslys var tilkynnt á svipuðum tíma í Garðabæ þar sem kona féll af hlaupahjólinu og var sögð meðvitundarlaus og að úr höfði hennar blæddi.

Umferðaróhapp varð í Kópavogi klukkan þrjú í nótt en ekkert slys varð á fólki. Ökumaðurinn var handtekinn grunaður um akstur undir áhrifum fíkniefna og var hann vistaður í fangageymslu fyrir rannsókn málsins.

Lögregla þurfti að hýsa nokkra í annarlegu ástandi í fangageymslum sínum í nótt.