Umhverfinu meiri greiði gerður með nýju álveri en loftslagsstefnu ríkisstjórnarinnar

Þar hélt hann því fram að með því að reisa eitt nýtt álver á Íslandi væri hægt að ná meiri árangri í loftslagsmálum en stefna stjórnvalda gerir núna.

„Ég er ekki að leggja til að við fjölgum álverum en það segir sína sögu að eitt nýtt álver myndi skila meiri árangri í loftslagsmálum en óhemju dýr stefna ríkisstjórnarinnar um að draga úr framleiðslu og lífsgæðum á Íslandi,“ sagði Sigmundur.

Þetta rökstuddi hann með þeim hætti að með því að framleiða minna ál á Íslandi væri í raun ekki komið í veg fyrir að álið yrði framleitt yfirleitt, heldur aðeins komið í veg fyrir að það yrði framleitt með þeim umhverfisvæna hætti sem það er gert með hér.

„Ég hef oft nefnt að ef álver flyttist frá Íslandi til Kína myndi losun vegna framleiðslunnar nærri tífaldast. Halda menn að ef álveri væri lokað hér yrði bara framleitt minna ál í heiminum. Aldeilis ekki, eftirspurnin mun áfram aukast og henni yrði þá mætt með kolabruna,“ sagði Sigmundur.

Sigmundur segir að stefna ríkisstjórnarinnar skerði lífsgæði Íslendinga enda snúi hún að því að framleiða minna. Hann vill fara öfuga leið, framleiða meira: „Það getur þýtt að losun landsins aukist fremur en að minnka en á heimsvísu mun það draga úr losun og vera það besta sem við getum gert í loftslagsmálum. En það mun líka bæta lífskjör Íslendinga.“

Formaðurinn fór um víðan völl í ræðu sinni og drap meðal annars á málefni eldri borgara og innflytjendamál. Í síðarnefndum málaflokki vill hann fara sömu leið og dönsk stjórnvöld, sem hafa stórlega hert landamæraeftirlit gagnvart flóttamönnum.

Munar öllu um Miðflokkinn

Fjallað hefur verið um breytingar á listum Miðflokksins, sem þykja ívið fjölbreyttari en endranær. Konur skipa þar meira áberandi sess og sömuleiðis fólk af erlendu bergi brotið. Sigmundur sagði að flokkurinn byði nú fram öfluga lista hugsjónafólks um allt land. Þetta leiddu sums staðar til átaka.

„Þótt ekki verði allir þeir sem setið hafa á þingi fyrir flokkinn á kjörtímabilinu í framboði í komandi kosningum hefur það fólk allt sýnt, svo ekki verður um villst, hvers það er megnugt. Við erum þeim þakklát og munum áfram njóta krafta þeirra og reynslu þótt það verði með öðrum hætti,“ sagði Sigmundur í ræðu sinni.

„Flokkur þarf að vera meira en bara þingmenn og sveitarstjórnafulltrúar. Flokkur þarf að vera hópur ósérhlífins fólks sem er tilbúið til að leggja á sig vinnu, oft mikla vinnu, vegna þess að það trúir því að það skipti raunverulega máli hvaða stefn ræður för við stjórn landsins.“

Sigmundur lauk langri ræðu sinni á þessum orðum: „Allir munu sjá svo ekki verður um villst að það munar öllu um Miðflokkinn.“