Sævar Atli skoraði sitt fyrsta mark í enn einum sigri Lyngby

Lyngby var með fullt hús stiga, tólf stig, eftir fyrstu fjóra leiki sína í deildinni en Fremad Amager var án stiga á botni deildarinnar.

Margir bjuggust þá eflaust við auðveldum sigri heimamanna í Lyngby en botnliðið gaf lítið eftir. Magnus Kastrup kom Lyngby í forystu eftir stundarfjórðungsleik en Jakob Johansson jafnaði fyrir gestina sex mínútum síðar.

1-1 stóð í hálfleik en Færeyingurinn Petur Knudsen kom Lyngby aftur yfir á 55. mínútu. Sú forystu entist enn skemur en sú fyrri þar sem Momo Fanye Touré jafnaði fyrir Fremad tveimur mínútum síðar.

Sanders Ngabo kom Lyngby yfir í þriðja sinn á 66. mínútu leiksins og þá innsiglaði Sævar Atli Magnússon 4-2 sigur liðsins í uppbótartíma. Sævar Atli kom inn á sem varamaður á 83. mínútu en markið er hans fyrsta frá skiptum sínum til liðsins frá Leikni Reykjavík.

Sævar kom inn á sem varamaður í leik gegn Hobro um helgina þar sem hann lagði upp tvö mörk og fer hann því vel af stað með danska liðinu.

Lyngby viðheldur fullkominni byrjun sinni á mótinu og er með 15 stig eftir fimm leiki. Samkeppnin er hins vegar hörð á toppnum. Frederica er aðeins tveimur stigum á eftir Lyngby og þá er Helsingör með tólf stig og á leik inni á topplið Lyngby.

Næsti leikur Lyngby er gegn Helsingör á laugardaginn kemur og þá ljóst að annað hvort liðanna, ef ekki bæði, munu tapa sínum fyrstu stigum á tímabilinu.

Sæti fyrrum danska landsliðsmannsins Peter Lövenkrands, sem lék með Schalke og Newcastle á sínum tíma, er hins vegar farið að hitna. Lövenkrands tók við Fremad í sumar og er liðið enn í leit að sínu fyrsta stigi.