Ákæra saksóknara fyrir að hylma yfir með morðingjum

Morðið á Ahmaud Arbery vakti verulega athygli í fyrra. Þrír hvítir karlmenn eltu hann og stöðvuðu þar sem hann var á skokki. Viðskiptum þeirra lauk þannig að mennirnir skutu Arbery til bana.

Þetta gerðist í febrúar í fyrra en yfirvöld í Brunswick í Georgía handtóku þá engan í tíu vikur. Það var ekki fyrr en myndband sem einn karlanna tók af drápinu fór í umferð á samfélagsmiðlum sem yfirvöld tóku málið alvarlega.

Í kjölfarið voru feðgarnir Travis og Gregory McMichael handteknir ásamt William Bryan sem slóst með þeim í för þegar þeir eltu Arbery uppi. Það var Bryan sem tók upp myndbandið sem kom upp um þá. Þeir sæta nú ákæru fyrir morð, alvarlega líkamsárás og fleiri brot í Georgíu en einnig alríkisákæru fyrir hatursglæp.

McMichael-feðgarnir hafa haldið því fram að þeir hafi talið Arbery vera karlmann sem hafi framið innbrot í hverfinu þeirra. Þeir hafi því veitt honum eftirför þegar þeir sáu hann skokka í gegnum hverfið. Nágranni þeirra Bryan hefur sagt lögreglu að annar feðganna hafi beitt Arbery kynþáttaníði áður en þeir skutu hann til bana.

Tengdist einum saksborninganna

Gregory McMichael starfaði áður sem lögreglumaður og rannsakandi á skrifstofu umdæmissaksóknara í Brunswick. Nú er Jackie Johnson, fyrrverandi yfirmaður hans þar, ákærð fyrir hvernig hún tók á morðinu á Arbery. 

Hún er sökuð um að hafa brotið gegn embættiseiði sínum og hindrað rannsókn lögreglu. Hún hafi sýnt af sér hlutdrægni og umhyggju fyrir McMichael og á sama tíma ekki sýnt fjölskyldu Arbery sanngirni eða virðingu þegar hún leitaði til annars umdæmissaksóknara sem taldi hægt að réttlæta drápið. Sá saksóknari sætir nú einnig rannsókn, að sögn Washington Post.

Johnson fékk George Barnhill, saksóknara í öðru umdæmi, til að koma að málinu. Sá komst að þeirri niðurstöðu eftir eins dags yfirlegu að engin ástæða væri til að handtaka þremenningana. Eftir að móðir Arbery gagnrýndi aðkomu saksóknarans að málinu ákvað Barnhill að stíga til hliðar en hélt því enn fram að karlarnir þrír hefðu átt rétt á því samkvæmt lögum að framkvæma borgaralega handtöku á Arbery og skjóta hann í sjálfsvörn.

Neitar sök

Johnson er sökuð um að hafa hindrað störf lögreglunnar með því að gefa út fyrirmæli í trássi við lög um að Travis, sonur Gregory, skyldi ekki handtekinn. Travis er sá sem er talinn hafa skotið Arbery með haglabyssu. Johnson tapaði endurkjöri til embættis saksóknara síðasta haust en hefur neitað að hafa gert nokkuð saknæmt í máli Arbery.

Lögreglan í Brunswick hefur einnig sætt harðri gagnrýni fyrir viðbrögð sín við drápinu. Lögreglumenn handtóku ekki feðgana þrátt fyrir að þeir kæmu að þeim blóðugum á vettvangi. Þá kannaði ekki lögreglumaðurinn sem var fyrstur á vettvang hvort Arbery væri með lífsmarki. Á upptöku búkmyndavélar lögreglumanna mátti sjá Arbery berjast við að ná að anda.

Lee Merritt, lögmaður Arbery-fjölskyldunnar, telur ákvörðun ákærudómstóls um að ákæra Johnson sögulega.

„Við sjáum sjaldan, og ég hef aldrei séð, að saksóknari sem hefur áhrif á rannsókn sé dreginn til ábyrgðar,“ segir Merritt.

Réttarhöld yfir McMichael-feðgunum og Bryan vegna ákærunnar fyrir hatursglæp eiga að hefjast fyrir alríkisdómstóli í Georgíu í febrúar. Áður verður réttað yfir þeim fyrir ríkisdómstól þar sem þeir svara fyrir morðákæruna í október, að sögn AP-fréttastofunnar.