Öflugasti skjálfti við Öskju frá aldamótum

Jarðskjálftinn mældist þrír að stærð, um sjö kílómetra norðvestur af Öskjuvatni, skömmu eftir klukkan átta í morgun.

„Það er búið að vera landris þarna í gangi og kvikuinnskot undir á um þriggja kílómetra dýpi, þannig að þetta bendir í raun til þess að það er áframhaldandi ris þarna á þessu svæði,” segir Lovísa Mjöll Guðmundsdóttir, náttúruvársérfræðingur hjá Veðurstofu Íslands. Það þurfi þó ekki endilega að þýða að eldgos sé yfirvofandi.

„Ekki eins og staðan er núna. Þetta er enn þá það djúpt niðri en við höldum bara áfram að fylgjast með,” segir hún. Skjálftinn sé stór fyrir þetta svæði.

„Það hafa um 300 skjálftar mælst á þessu svæði og þetta er stærsti skjálfti síðan um aldamótin. Sá næststærsti var árið 2014 og mældist 2,5 að stærð, en þeir eru allir á svipuðu dýpi.”

Á sama tíma hefur skjálftavirkni við Keili minnkað. „Frá miðnætti hafa um 100 skjálftar mælst þannig að þetta fer minnkandi dag frá degi. Þar sem skjálftarnir eru enn á svo miklu dýpi hafa engir mælar mælt neina kviku og það yrði ekki fyrr en hún væri komin hærra upp sem við gætum greint hana,” segir Lovísa.

„Það er spurning, ef þetta var vika, hvort hún sé að hætta að troða sér þarna upp. Við vitum það ekki alveg.”