Kanslari Austur­ríkis stígur til hliðar

Breska ríkisútvarpið greinir frá því að Kurz hafi lagt til að utanríkisráðherrann Alexander Schallenberg tæki við embættinu.

Kurz og níu aðrir eru nú til rannsóknar í kjölfar húsleitar sem gerð var á skrifstofum flokks kanslarans, Þjóðarflokksins. Flokkurinn er sakaður um að hafa greitt fyrir auglýsingar í götublaði í skiptum fyrir hagstæða umfjöllun og að blaðið birti skoðanakannanir með slagsíðu á árunum 2016 til 2018 að minnsta kosti.

Kurz hafnar alfarið ásökununum á hendur sér en hefur sagst vilja með afsögn sinni stilla til friðar meðan málið verður rannsakað. Hann mun þó áfram leiða Þjóðarflokkinn og sitja á þingi.

„Ég mun fyrst og fremst nota þetta tækifæri til þess að afsanna þessar ásakanir á hendur mér,“ hefur BBC eftir Kurz.