SÞ í­trekað hundsað beiðnir um af­hendingu gagna vegna sprengingarinnar í Beirút

Rannsókn málsins hefur ítrekað verið frestað og verið sett á ís vegna deilna rannsakenda og fyrrverandi ráðherra Líbanon. Fórnarlömb og fjölskyldur þeirra eru því ekkert nær því að vita hvort einhverjum sé um að kenna eða hver beri ábyrgð á sprengingunni. Þetta kemur fram í ítarlegri umfjöllun breska ríkisútvarpsins um málið.

Ráðist var í umfangsmikla rannsókn á sprengingunni í kjölfar hennar. Hún hefur hins vegar ítrekað verið sett á ís vegna deilna Tareks Bitar, dómara og aðalrannsakanda, og fyrrverandi ráðherra og hátt settra stjórnmálamanna. Þeir hafa ítrekað neitað að mæta til skýrslutöku og nokkrir þeirra kvartað formlega undan Bitar. Þá brutust út ofbeldisfull mótmæli vegna starfa Bitars sem leiddu til þess að sjö dóu. 

Málið hefur klofið ríkisstjórn landsins, sem hefur ekki fundað svo mánuðum skiptir. Óhætt er að segja að stjórnarkreppa ríkir í Líbanon, sem nauðsynlega þarf starfandi stjórnvöld til að taka á málum. 

Staða rannsóknarinnar hefur verið gagnrýnd alþjóðlega en Sameinuðu þjóðirnar, valda- og áhrifamestu alþjóðasamtök dagsins í dag, hafa hundsað hjálparköll. 

Sameinuðu þjóðirnar kölluðu, viku eftir sprenginguna, eftir því að fram færi sjálfstæð rannsókn á sprengingunni. Samkvæmt heimildum breska ríkisútvarpsins hafa SÞ hins vegar ítrekað hundsað hjálparbeiðnir fjölskyldna hinna látnu um afhendingu nauðsynlegra gagna. 

Sendu bréf á aðalritara Sameinuðu þjóðanna en ekkert svar hefur borist

Lögmannafélagið Beirut Bar Association fer með mál nær allra þeirra sem voru fórnarlömb í sprengingunni. Það eru um tvö þúsund eftirlifendur og fjölskyldur fólks sem fórst í sprengingunni. Formaður félagsins hefur sent Antonio Guterres, aðalritara Sameinuðu þjóðanna, þrjú bréf síðasta árið þar sem hann hefur óskað eftir upplýsingum frá SÞ. Engu þessara bréfa hefur verið svarað. 

Í bréfunum er óskað eftir tvennu; annars vegar gervihnattarmyndum sem teknar voru af aðildarríkjum SÞ af sprengisvæðinu daginn sem sprengingin varð; og hins vegar upplýsingum um það hvort Unifil, friðargæslusveitir Sameinuðu þjóðanna í Líbanon, hafi rannsakað farm skipsins MV Rhostus, skipið sem flutti gróðuráburðinn sem sprakk í loft upp, árið 2013 þegar það landaði áburðinum í Beirút. 

Rússland tilkynnti í síðustu viku að Roscosmos, geimvísindastofnun Rússlands, væri að undirbúa afhendingu gervihnattamynda sem teknar voru daginn sem sprengingin varð. Samkvæmt tilkynningunni hafði Michel Aoun, forseti Líbanon, óskað eftir afhendingu myndanna.

Fyrsta bréfið var sent til Guterres þann 26. október 2020. Ítrekunarbréf var svo sent þremur vikum síðar, 19. nóvember, þar sem fram kom að hundrað dagar væru þá liðnir frá sprengingunni og að ekkert aðildarríki SÞ eða Unifil hefðu lagt fram gervihnattamyndir eða aðrar upplýsingar um sprenginguna. 

Þriðja bréfið var sent 17. mars á þessu ári. Þar segir: „Sjö mánuðir eru liðnir frá sprengingunni og fimm síðan við sendum bréfið okkar. Því miður hefur bréfi okkar ekki verið svarað. Líbanon er eitt stofnríkja Sameinuðu þjóðanna og er að biðja um hjálp.“