Talið að Zlatan sleppi úr búrinu og met Tottis gæti fallið

Ítalski miðillinn Gazzetta dello Sport spáir því að Zlatan verði í byrjunarliði AC Milan á miðvikudag þegar liðið sækir Atlético Madrid heim. „Að skilja ljón eftir í búrinu á leikvangi eins og Wanda Metropolitano er eiginlega ómögulegt,“ segir blaðið.

Zlatan, sem orðinn er fertugur, hefur skipst á við hinn 35 ára gamla Olivier Giroud um að leiða sóknarlínu Milan í vetur. Zlatan hefur komið við sögu í tveimur leikjum í Meistaradeildinni það sem af er leiktíð, í bæði skiptin sem varamaður.

Zlatan skoraði hins vegar tvö mörk fyrir Milan í 4-3 tapinu gegn Fiorentina í ítölsku deildinni um helgina og þar með varð Svíinn elsti leikmaðurinn til að skora tvennu í efstu deild Ítalíu, 40 ára og 48 daga gamall.

Hann getur sett aldursmet í Meistaradeildinni skori hann gegn Atlético á miðvikudaginn. Francesco Totti, gamla Roma-goðsögnin, á metið sem elsti markaskorari keppninnar en hann var 38 ára og 59 daga þegar hann skoraði sitt síðasta meistaradeildarmark. Zlatan getur því bætt metið um tvö ár.

Ljóst er að AC Milan þarf sárlega á sigri að halda í Madrid. Liðið er neðst í B-riðli með eitt stig – þremur stigum á eftir Atlético og fjórum á eftir Porto. Liverpool er búið að tryggja sér sigur í riðlinum þó tvær umferðir séu eftir.