Henderson og Robertson klárir fyrir leikinn gegn Porto

Henderson kom inn á sem varamaður í 4-0 sigri Liverpool gegn Arsenal um helgina, en hann meiddist lítillega með enska landsliðinu í seinustu viku. Robertson var hins vegar fjarri góðu gamni vegna meiðsla.

Jürgen Klopp, stjóri liðsins, staðfestir hins vegar að leikmennirnir verði klárir í slaginn gegn Porto í Meistaradeild Evrópu annað kvöld ef liðið þarf á þeim að halda.

„Við þurfum að taka ákvarðanir,“ sagði Klopp. „Sama hvernig við stillum liðinu upp þá snýst þetta allt um að vinna þennan leik, sem og næstu leiki. Þess vegna erum við hér.“

Klopp og lærisveinar hans þurfa hins vegar ekki að hafa miklar áhyggjur af næstu tveim leikjum í Meistaradeildinni, en liðið hefur nú þegar tryggt sér sigur í B-riðli. Liðið er með fullt hús stiga eftir fjóra leiki og er með sjö stiga forskot á Atlético Madrid sem situr í öðru sæti riðilsins.