Dramatískt jafntefli í Sviss | Allt galopið í G-riðli

Duvan Zapata kom Atalanta yfir gegn Young Boys strax á tíundu mínútu áður en Theoson Jordan Siebatcheu jafnaði metin fyrir hálfleik.

Jose Luis Palomino kom Atalanta yfir á ný snemma í seinni hálfleik, en mörk frá Silvan Hefti og Vincent Sierro komu heimamönnum í Young Boys í 3-2 þegar rúmar fimm mínútur voru til leiksloka.

Það var svo Luis Muriel sem jafnaði metin á 88. mínútu beint úr aukaspyrnu eftir að hafa komið inn á sem varamaður sérstaklega til að taka spyrnuna. Niðustaðan varð því 3-3, en jafnteflið þýðir að veik von Young Boys um 16-liða úrslit er úr sögunni. Atalanta er hins vegar á leið í hreinan úrslitaleik gegn Villareal í lokaumferðinni.

Í G-riðli vann Lille 1-0 sigur gegn Salzburg og Sevilla vann 2-0 gegn Wolfsburg. Úrslitin þýða það að Lille er með átta stig fyrir lokaumferðina, Salzburg sjö, Sevilla sex og Wolfsburg fimm. 

Það eiga því öll liðin möguleika á sæti í 16-liða úrslitum fyrir lokaumferðina, en þá mætast Salzburg og Sevilla annars vegar og hins vegar Wolfsburg og Lille.

Úrslit kvöldsins