Nýtt og glæsilegt Grillhús á Laugavegi

„Við teljum okkur hluta af miðbæjarflórunni og gleðjumst mjög yfir að vera komin aftur niður í bæ,“ segir Þórður Bachmann, eigandi Grillhússins en á dögunum var opnað nýtt Grillhús að Laugavegi 96 eftir að dyrunum var lokað á Tryggvagötu fyrir rúmu ári. Saga Grillhússins og miðbæjarins nær aftur um tæpa þrjá áratugi en Grillhúsið var opnað á Tryggvagötunni árið 1994. Nýi veitingastaðurinn er glæsilega innréttaður á þremur pöllum.

„Við uppfærðum útlitið mikið og segja má að hér sé komið Grillhús 21 aldarinnar,“ segir Þórður. „Pallarnir gefa staðnum mjög skemmtilegt yfirbragð og skapa kósý stemmningu þar sem hópar geta verið aðeins út af fyrir sig. Þetta smellpassar fyrir smærri hópa sem vilja hittast í hádeginu, halda upp á afmæli eða önnur tilefni, en líka fyrir notalegan tveggja manna dinner. Við höfum sérstaklega gaman af því að taka á móti afmælisbörnum hjá okkur á Grillhúsinu og fá þau alltaf sérstaka athygli hjá okkur. 

Lýsingin er falleg og þá er glæsilegur bar á staðnum og mikið úrval af kokteilum á frábæru verði. Við hreyfðum hins vegar ekkert við matseðlinum, hann er löngu orðinn klassík sem fólk vill geta gengið að. Hjá okkur fær fólk alla uppáhaldsréttina á einum stað,“ segir Þórður.

Á matseðlinum er að finna fjölbreytta rétti, frá hamborgurum, salötum og léttum réttum yfir í nautasteikur, rif og grillspjót.

„Fiskurinn er gríðarlega vinsæll hjá okkur og eins spjótin og steikurnar en rifin eru okkar signature réttur. Hádegistilboðin okkar hafa notið gríðarlegra vinsælda gegnum árin og við höldum áfram með þau og einnig Brunchinn. Við erum sérstaklega heppin með aðgengi að Grillhúsinu en í Stjörnuportinu við hliðina á okkur er bílastæðahús,“ segir Þórður.

Þá er Grillhúsið komið í blússandi jólaskap og jólaréttirnir komnir á matseðilinn.

„Sultuslakur er heitið á jólaborgaranum okkar og þá erum við með smáréttaplatta með jólaþema. Plattinn er fínn fyrir tvo að deila fyrir mat eða fyrir einn sem aðalréttur. Á honum eru ýmsir jólaréttir svo sem hangikjötstartalettur, stökk svínasíða og fleira jólagóðgæti. Svo mælum við með jólaglöggi til að ylja kroppinn eftir göngutúrinn í miðbænum,“ segir Þórður.