„Það kom smá babb í bátinn“

Kolbeinn Tumi Daðason skrifar 7. febrúar 2022 14:43

Svona var staðan á sjöunda tímanum í morgun. Síðan þá hafa sveitungar lagt hönd á plóg. North West Hotel & Restaurant

Eigendur North West Hotel & Restaurant við Þjóðveginn í Húnaþingi vestra láta sig dreyma um að geta opnað veitingastaðinn á morgun klukkan 17 eftir að stormurinn í nótt gerði þeim grikk. Til stóð að opna í dag en snjósprengja snemma í morgun seinkaði þeim áformum.

„Það bara sprakk upp útidyrahurðin okkar,“ segir Kristinn Bjarnason eigandi staðarins. Hann segir vindinn hafa legið beint á útidyrnar með þeim afleiðingum að hún sprakk upp.

„Svo var fólk að reyna að halda þessu lokuðu eins og hægt var, en það var erfitt.“

Eins og svo oft áður voru það liðsmenn björgunarsveitanna, í þessu tilfelli Húna frá Hvammstanga, sem mættu og negldu hurðina fasta.

„Veðrið var algjörlega ruglað,“ segir Kristinn.

Tryggingarnar séu lottó

Til stóð að opna staðinn í dag klukkan 17 eftir nokkurra vikna lokun. Þau voru búin að mæta nokkrum dögum fyrr til að gera allt klárt. Þrífa og undirbúa matvæli. Gera allt klárt.

„En það kom smá babb í bátinn,“ segir Kristinn á léttum nótum.

Veitingastaðurinn á fallegum sumardegi.North West Hotel & Restaurant

„Það er erfitt að meta tjónið. Það er rosaleg bleyta í húsgögnum og borðum. Svo voru tölvukerfin fyrir kælana og annað undirlögð í snjó,“ segir Kristinn. Þetta hafi verið hressandi í morgunsárið.

„Svo er alltaf spurning hvort maður hafi verið rétt tryggður. Það er lottóið.“

Borgarbörn með ævintýraþrá

Veitingastaðurinn og gistiheimilið er rekið í gömlu Víðigerði, miðja vegu á milli Hvammstanga og Blönduóss, og um miðja vegu milli Reykjavíkur og Akureyrar. Kristinn útskýrir að hann sé borgarbarn en ævintýraþrá hafi dregið borgarbúana út á landið fyrir tíu árum. Þar séu þau enn enda líði þeim vel í sveitinni.

„Við ætluðum að taka flipp úti á landi í tvö til þrjú ár og erum enn í því flippi.“

Sem fyrr segir stendur til að opna á nýjan leik á morgun klukkan 17.

Veður Húnaþing vestra