Segist hafa nýtt kvartanirnar til að bæta sig í starfi

Viðar hefur brugðist við fréttaflutningi af væringum milli starfsfólks á skrifstofu stéttarfélagsins og Sólveigar Önnu Jónsdóttur fyrrverandi formanns og nú formannsframbjóðanda. Hann segir það sem fram kemur í því sem Viðar kallar nafnlausan leka til þess ætlaðan að koma höggi á framboð Sólveigar tilhæfulaust með öllu.

„Enn eina ferðina gerist það að andstæðingar mínir og Sólveigar Önnu Jónsdóttur grípa til leka í fjölmiðla til að bera út róg um okkur. Barátta fyrrverandi og núverandi starfsmanna á skrifstofu Eflingar til að hafa áhrif á yfirstandandi kosningar félaga í Eflingu er fordæmalaus,“ segir Viðar í upphafi pistils sem hann birtir á Facebook-síðu sinni.

Ásakanir á ásakanir ofan

Nú eru yfirstandandi formannskosningar í Eflingu. Fyrir liggur að þær eru harðar. Kosningarnar hófust í morgun og standa í viku. Vísir hefur fjallað um téðar væringar þar sem bæði hefur verið greint frá skýrslu sálfræði- og ráðgjafastofunnar Lífs og sálar en þar kemur fram að Viðar hafi gerst sekur um kvenfyrirlitningu og einelti. Þetta er samkvæmt úttekt sem gerð var á vinnustaðnum í vetur. Viðar hefur fyrir sína parta vísað þessu á bug. 

Og þá heldur hópur kvenna því fram að þær hafi komið ábendingum áfram til Sólveigar Önnu í gegnum mannauðsstjóra Eflingar sem snéru að umkvörtunum vegna framgöngu Viðars; að hann hafi komið illa fram við starfsfólkið. Vísir hefur þessar kvartanir undir höndum.

Átakasaga seinni tíma innan Eflingar er að verða býsna flókin og viðamikil. Sólveig Anna var meðal annarra frambjóðenda í Pallborði Vísis í gær og svaraði þessu þá svo til að hún hafi fengið að sjá umræddar kvartanirnar á sínum tíma, ekki þó þannig að hún fengi að halda þeim til að gaumgæfa og hún hafi tekið þeim alvarlega.

Hefur ekkert með það að gera hvort um konur er að ræða eða ekki

Viðar, sem hefur neitað þessu einnig, tekur upp þennan þráð í sínum pistli:

„Nú eru birtir textar á Visir.is sem eru sagðir vera „kvartanir“ frá starfsfólki um að ég hafi komið illa fram við það. Jafnframt er Sólveig Anna sökuð um að hafa sagt ósatt um meðhöndlun hennar á meintum kvörtunum. Eins og með fleiri innri rekstrargögn af mínum fyrri vinnustað sem hafa ratað í fjölmiðla á síðustu dögum er þeim lekið nafnlaust og án þess að ég hafi fengið tækifæri til að kynna mér það sem haldið er fram,“ segir Viðar.

Framkvæmdastjórinn fyrrverandi segir sannleikann í málinu þann að Sólveig Anna hafi miðlað til sín inntaki úr almennum nafnlausum ábendingum vorið 2021 sem henni höfðu borist með milligöngu mannauðsstjóra.

„Þessar kvartanir voru þó ekki afhentar Sólveigu á skriflegu formi. Engri ósk var komið á framfæri um að setja þær í neitt formlegt ferli, enda var ekki hægt að sjá hvað í þeim hefði átt að gefa tilefni til slíks. Þrátt fyrir þetta miðlaði Sólveig Anna þessum ábendingum til mín af fullri alvöru. Ég tók þeim vel, tók þær alvarlega og nýtti mér þær til að bæta mig í starfi líkt og ég hef áður gert við aðra endurgjöf sem ég hef móttekið í ýmsum störfum mínum í gegnum árin.“

Viðar rekur þetta mál ítarlega eins og það horfir við honum í pistlinum. Aðeins eitt formlegt erindi hafi borist en það varðaði einstakling sem Viðar segir ljóst að hafi ekki verið á réttri hillu hjá Eflingu.  

Segist hafa átt farsælt samstarf við sína undirmenn

Viðar segir jafnframt mikið úr því gert að hópur óánægðra fyrrum og núverandi starfsmanna Eflingar séu konur, hópur sem nú fari fram „með linnulausum árásum á mig og Sólveigu Önnu“. Kyn hafi hins vegar ekkert með þetta mál að gera.

„Kyn hafði ekkert með það að gera hvernig tekið var á vandamálum þessara starfsmanna. Konur eru í miklum meirihluta á skrifstofu Eflingar, bæði meðal almennra starfsmanna og stjórnenda.“

Þannig séu verulegar líkur á því að konur eigi í hlut þegar mál koma upp, sama hvers eðlis þau eru.

„Ég átti mjög farsælt samstarf við alla mína undirmenn á skrifstofum Eflingar sem náðu góðum árangri í starfi og reru í sömu átt og félagið og í þeim hópi eru margar konur. 

Ég er stoltur af þætti mínum í sögulegri baráttu Eflingar fyrir láglaunafólk og af því að hafa fengið að starfa undir öflugasta núlifandi kvenleiðtoga landsins,“ segir Viðar sem hefur gefið það út að ef Sólveig Anna sigri og þá muni hann líta á það sem heiður að taka við þar sem frá var horfið í framkvæmdastjórastarfinu.