„Hugmyndin var í mörg ár að malla í hausnum á okkur“

Gamall draumur

Karen er viðburðastjóri og förðunarfræðingur að mennt og Andri starfar sem kennari í Árbæjarskóla. Hann er einnig gítarleikari í ballhljómsveitinni Bandmönnum ásamt því að sitja í stjórn Tónhyls.

„Hugmyndin var í mörg ár að malla í hausnum á okkur. Alltaf þegar við fórum í bíltúr eða ferðalag og sáum eitthvað krúttlegt húsnæði þá hugsuðum við að hérna væri geggjað að opna kaffihús"

segir Karen um það hvaðan hugmyndin kom. Sjálf stunda þau það mjög mikið að fara á kaffihús og eru miklir kaffiunnendur.

Fundu rými

Tónlistarfélag Árbæjar rekur tónlistarklasann Tónhyl en kaffihúsið Melodía er staðsett í hjarta klasans. Þeir Kristján Sturla Bjarnason, Brynjar Ingi Unnsteinsson, Andri Már Magnason, Pétur Finnbogason og Ásgrímur Geir Logason tóku höndum saman, stofnuðu Tónhyl og gerðu upp allt húsnæðið til að uppfylla þær þarfir sem fylgja starfseminni í dag. Starfsemin þar er lifandi og þar starfa tónlistarmenn úr öllum geirum tónlistarheimsins.

Á síðasta ári ákvað félagið sem er ört stækkandi að taka yfir stærri part af húsnæðinu og þá kom upp sú hugmynd að Andri og Karen myndu nýta hluta af því í að opna Melodíu. Við tóku miklar framkvæmdir og stefnumótun en hefur parinu tekist vel að gera rýmið að sínu innan hússins.

Allt vegan

Á Melodíu er allt bakkelsi án mjólkur og eggja sem gerir kaffihúsið 100% vegan og aðgengilegt fyrir mjög breiðan hóp af fólki. Sjálf gerðust Karen og Andri grænkerar eftir að sonur þeirra greindist með mjólkur- og eggjaofnæmi. 

„Í öllum okkar kaffihúsaferðum var alltaf jafn leiðinlegt að sonur okkar gæti ekki fengið allt sem hann vildi og oft þurfti hann að fá að heyra „nei það er egg eða mjólk í þessu" nokkrum sinnum áður en hann fann eitthvað sem hann mátti fá.“

Segir Karen um hugmyndina að opna vegan kaffihús. Allt bakkelsið á Melódíu kemur frá Hérastubbi, bakaríi í Grindavík.

„Sonur okkar er allavega hæstánægður með að fá loksins svona mikið úrval af góðum kaffihúsamat,“ 

bætir hún við.

Hlýlegt umhverfi sem býður þig velkomin

Karen sá um að hanna staðinn en hún sótti mestan innblástur í kaffihús erlendis frá eins og Skandinavíu og Balí. Hún hefur brennandi áhuga á innanhúshönnun enda ekki langt að sækja það frá móður sinni Margréti Sigfúsdóttur innanhúsarktítekts.

„Hugmyndin var að þér á að finnast þú vera komin í örlítið annan heim þegar þú kemur inn á Melodíu, finnst þú vera velkomin og upplifa ákveðinn hlýleika,“

segir hún. Framkvæmdirnar hófust síðasta sumar og stóðu meira og minna fram í byrjun febrúar á þessu ári, með hléum og hefur það skilað sér í fallegu umhverfi á kaffihúsinu. 

„Við erum svo heppin að eiga harðduglegt fólk í kringum okkur sem var viljugt til þess að hjálpa okkur gríðarlega mikið við uppbyggingu staðarins og svo verðum við að gefa okkur sjálfum klapp á bakið fyrir að vinna dag og nótt í að láta drauminn rætast.“