Besta-spáin 2022: Déjà Vu í Vestur­bænum

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild karla með árlegri spá sinni fyrir mótið. Keppni í deildinni hefst með leik Víkings og FH mánudaginn 18. apríl. Víkingar eiga titil að verja en þeir urðu Íslandsmeistarar í sjötta sinn í sögu félagsins í fyrra.

Íþróttadeild spáir KR 5. sæti Bestu deildarinnar í sumar og að liðið fari niður um tvö sæti frá síðasta tímabili.

Rúnar Kristinsson er að hefja sitt fimmta tímabil sem þjálfari KR eftir að hann sneri aftur í Vesturbæinn eftir að hafa þjálfað í Noregi og Belgíu. Þetta seinna skeið Rúnars hjá KR hefur ekki verið jafn gjöfult og það fyrra (2010-14). Þá vann KR tvo Íslandsmeistaratitla og þrjá bikarmeistaratitla. Frá því Rúnar kom aftur í KR hefur liðið bara unnið Íslandsmeistaratitilinn 2019.

KR var aldrei í titilbaráttu á síðasta tímabili en náði Evrópusæti í lokaumferðinni. Stærsta breytingin á leikmannahópi KR er að fyrirliði liðsins sem og leikja- og markahæsti leikmaður í sögu þess, Óskar Örn Hauksson, er horfinn á braut eftir fimmtán ár í Frostaskjólinu.

Fyrir utan Óskar eru aðalleikararnir í KR þeir sömu og í fyrra. Liðið hefur hins vegar bætt við sig miðjumanninum Halli Hanssyni, landsliðsmanni frá Færeyjum sem er samkvæmt orðinu á götunni launahæsti leikmaður deildarinnar, og svo nokkrum aukaleikurum.

Kjartan Henry verið að glíma við meiðsli í vetur og byrjar í tveggja leikja banni. Kristján Flóki Finnbogason fótbrotnaði í æfingaleik nýverið og verður líklega frá keppni í allt sumar. Það er því ljóst að téðir aukaleikarar þurfa að stíga upp ef ekki á illa að fara.

Svona var síðasta sumar í tölum

Liðið og lykilmenn

Kristinn Jónsson, bakvörður (f. 1990): Einn besti leikmaður deildarinnar undanfarin ár. Verið algjör lykilmaður í öllu sem KR gerir og á skilið að berjast um titla. Er að öðrum ólöstuðum besti og mikilvægasti leikmaður liðsins. 

Pálmi Rafn Pálmason, miðjumaður (f. 1984): Fyrirliði þeirra KR-inga og akkerið á miðjunni. Fær það hlutverk að sitja djúpt og leyfa Theódóri Elmari Bjarnasynu og Halli Hanssyni að taka virkan þátt í sóknarleiknum. Er ekkert að yngjast og spurning hvernig hann mun höndla aukið álag. 

Kjartan Henry Finnbogason, sóknarmaður (f. 1986): Missir af fyrstu tveimur leikjum sumarsins vegna leikbanns. Ef KR ætlar að vera með í toppbaráttunni má þessi magnaði leikmaður ekki missa af fleiri leikjum. Skemmtilegur karakter og enn skemmtilegri leikmaður með nef fyrir mörkum. Skoraði 7 í 17 leikjum í fyrra og vill eflaust gera enn betur í ár.

Fylgstu með: Stefán Árni Geirsson, kantmaður (f. 2000)

Sýndi lipra takta á síðustu leiktíð en fær enn veigameira hlutverk í ár. Er einn óútreiknanlegasti leikmaður liðsins en í ár þarf þessi U-21 árs landsliðsmaður að skila mörkum og stoðsendingum ætli KR sé að vera í titilbaráttu.

Markaðurinn

KR-ingar hefja nú lífið eftir brotthvarf Óskars Arnar Haukssonar, eins dáðasta leikmanns í sögu félagsins, en aðrir leikmenn sem félagið missti í vetur voru í litlu eða engu hlutverki í fyrra.

KR gerði ein af allra mest spennandi viðskiptum vetrarins þegar félagið fékk færeyska landsliðsfyrirliðann Hall Hansson á miðjuna hjá sér. Hallur lék síðast með danska liðinu Vejle og var áður hjá Horsens, þar sem hann var liðsfélagi Kjartans Henrys, og á að baki 69 A-landsleiki.

Aðrir leikmenn sem KR hefur bætt við sig eiga eftir að sýna að þeir eigi heima í liði sem ætlar í toppbaráttu. Hinn stóri og kraftmikli Stefan Ljubicic skoraði þó sex deildarmörk fyrir HK í fyrra og Sigurður Bjartur Hallsson raðaði inn mörkum í Lengjudeildinni í fyrra.

Aron Snær Friðriksson var aðalmarkvörður Fylkis og mun veita Beiti aðhald, og Aron Kristófer Lárusson lék bæði sem bakvörður og kantmaður með Skagamönnum.

Að lokum …

KR er eins og síðustu ár með mjög leikreynt og lið og stillir vanalega upp byrjunarliði þar sem meðalaldurinn er rúmlega þrjátíu ár. Það vantar ekkert upp á reynsluna eða kunnáttuna í röðum KR en í honum eru átta leikmenn sem hafa leikið landsleiki og níu sem hafa spilað sem atvinnumenn. En þeir eru langflestir á röngum enda ferilsins.

Ef KR ætlar að gera betur en undanfarin tvö tímabil og þjarma almennilega að toppliðunum verða Meistaravellir að standa undir nafni. Sumarið 2020 var KR með tíunda besta árangurinn á heimavelli og í fyrra með þann áttunda besta. KR-ingar hafa aftur á móti aðeins tapað einum útileik undanfarin tvö tímabil.