Ástralskur fram­herji til liðs við Breiða­blik

Blikar enduðu í 2. sæti á síðustu leiktíð en urðu bikarmeistarar ásamt því að taka þátt í riðlakeppni Meistaradeildar Evrópu. Nokkrar breytingar hafa orðið á liðinu síðan síðasta haust og nú hefur verið ákveðið að styrkja framlínuna enn frekar.

Á vefnum Blikar.is kemur fram að liðið hafi fengið hina 22 ára gömlu Ayers á láni út tímabilið. Hún kemur frá ástralska meistaraliðinu Melbourne Victory. Alls skoraði Ayers átta mörk í 14 leikjum á nýafstaðinni leiktíð en hún byrjaði tímabilið á meiðslalistanum.

Hún endaði tímabilið hins vegar frábærlega og átti stóran þátt í að Melbourne landaði meistaratitlinum annað árið í röð.

Ayers á að baki sex leiki fyrir U-20 ára landslið Ástralíu, skoraði hún þrjú mörk í leikjunum sex.

Svo virðist sem lið hér á landi sækist í sífellt meiri mæli eftir leikmönnum frá hinum enda hnattarins en nýverið sömdu nýliðar KR við tvær frá Ástralíu og í Bestu deild karla sótti Fram einnig leikmann til Ástralíu.

Breiðablik byrjar Bestu-deildina á Kópavogsvelli þann 27. apríl næstkomandi þegar Þór/KA kemur í heimsókn.

Besta deildin er á Stöð 2 Sport en nýtt keppnistímabil hefst 18. apríl. Smelltu hér til að horfa á leiki og þætti. Besta deildin er hluti af Stöð 2 Sport Ísland sem kostar 3.990 kr. á mánuði og má kaupa hér.