FH ekki tekið neina ákvörðun um Eggert

Eins og Vísir greindi frá fyrr í dag er endanleg niðurstaða ekki komin í mál Eggerts og Arons sem kærðir voru fyrir hópnauðgun í Kaupmannahöfn árið 2010. Þeir hafa báðir neitað sök og héraðssaksóknari vísaði málinu frá en sú niðurstaða hefur nú verið kærð.

Samkvæmt nýjum reglum sem stjórn KSÍ hefur sett fyrir sambandið hefur þetta í för með sér að Aron og Eggert eru ekki gjaldgengir í íslenska landsliðið en Eggert hefur reyndar ekki spilað landsleik síðan árið 2019.

Staða Eggerts hjá FH er hins vegar í óvissu en hann var látinn stíga til hliðar 21. apríl, eftir að FH hlaut gagnrýni vegna þess að Eggert spilaði fyrir liðið þrátt fyrir að niðurstaða hefði ekki fengist í nauðgunarmálinu. Þegar héraðssaksóknari hafði vísað málinu frá sneri Eggert svo til fyrri starfa fyrir hálfum mánuði og hann hefur síðan leikið tvo leiki.

„Tökum þá ákvörðun sem við teljum rétta og besta“

FH-ingar hafa ekki tekið ákvörðun um framhaldið:

„Við erum ekki búin að taka neina ákvörðun. Við vorum náttúrulega bara að fá að vita af þessu svo að það hefur ekki verið tekin nein ákvörðun,“ segir Davíð Þór Viðarsson, yfirmaður knattspyrnumála. En var þá ekki búið að ræða það að þessi staða gæti komið upp?

„Það hefur að sjálfsögðu verið rætt en engin ákvörðun tekin. Málið er því bara þannig statt núna. Við skoðum þetta núna og tökum þá ákvörðun sem við teljum rétta og besta,“ segir Davíð.

FH á fyrir höndum bikarleik í kvöld í Kaplakrika klukkan 19:15, gegn Kára í 32-liða úrslitum Mjólkurbikarsins.