Eiður Smári í sigti grísks stórveldis

Frá þessu greina grískir fjölmiðlar og segja AEK vilja fá Eið til starfa sem yfirmann íþróttamála hjá félaginu.

Gazzetta greindi frá því í gær að Eiður væri í sigti AEK en hann lék með liðinu tímabilið 2011-2012 en lék reyndar minna en ella með liðinu vegna fótbrots.

Gazzetta segir að aðeins eigandinn Dimitris Melissanidis viti nákvæmlega hvaða störfum hugmyndin sé að Eiður gegni hjá AEK. Honum sé þó ætlað að starfa með Pólverjanum Radoslaw Kucharski, nýráðnum yfirmanni knattspyrnumála, nýráðna þjálfaranum Matías Almeyda og mögulega Bruno Alves sem Gazzetta segir útlit fyrir að leggi skóna á hilluna til að hefja störf hjá AEK.

Þó að Gazzetta segi Eið Smára starfa fyrir Knattspyrnusamband Íslands þá hefur hann ekki gert það síðustu mánuði og ekki þjálfað lið síðan að hann hætti sem aðstoðarþjálfari íslenska A-landsliðsins í vetur. KSÍ nýtti þá uppsagnarákvæði í samningi við hann, í kjölfar áfengisdrykkju eftir lokaleik Íslands í undankeppni HM.

AEK hafnaði í 5. sæti grísku úrvalsdeildarinnar á leiktíðinni sem lauk 17. maí. Það er langt undir því sem félagið ætlar sér enda var tvívegis skipt um þjálfara á leiktíðinni. Liðið varð síðast grískur meistari árið 2018 og þá í tólfta sinn.

AEK hefur áður haft Íslending í starfi utan vallar en Arnar Grétarsson, núverandi þjálfari KA, var yfirmaður knattspyrnumála hjá félaginu á árunum 2010-2012.

Arnar lék með AEK á árunum 1997-2000, Elfar Freyr Helgason var liðsfélagi Eiðs hjá liðinu 2011-2012, og Arnór Ingvi Traustason var að láni hjá félaginu leiktíðina 2017-2018.